El 74% de les empreses asturianes suspende n’Internet según consta nel Informe Andcoo ‘Webs d’empreses n’Asturies 2016’ qu’analizó con 30 criterios relativos a diseñu, desenvolvimientu y comunicación de 100 empreses asturianes.
Según informó Andcoo al traviés d’una nota de prensa, namá una de cada cuatro webs d’empreses asturianes aprueba en diseñu, comunicación y desenvolvimientu. Namá un 8% supera con nota los 30 criterios del Informe.
La presencia de marca n’Internet sigue siendo una asignatura pindia pa les empreses asturianes. Namá un terciu de les webs asturianes cuenta con un diseñu a midida o que fuera personalizáu d’alcuerdu a el colores, formes y tipografíes corporatives.
El 61% de les empreses analizaes nun ufierta información corporativa abonda a nivel testual y visual. Malapenes el 15% de les webs foi actualizada mientres l’últimu mes y tan solo el 5% redactó’l conteníu d’alcuerdu a criterios SEO. La metá de les empreses incumple de dalguna forma los avisos llegales obligatorios. El 29% de les empreses cunta con perfiles en dalguna rede social actualizáu regularmente.
Trés de cada cuatro webs nun tán optimizaes pa dispositivos móviles y tabletas. L’analís detecta la poca orientación comercial de les webs asturianes. La mayor parte de les webs nun trabayaron la home, considerada l’escaparate principal, d’una forma visualmente curiosa.
Amás, como patrón xeneral, nun s’emplega un estilu de comunicación afechu pa promocionar los productos y servicios según captar y fidelizar veceros. De tolos criterios, la comunicación ye’l gran talón d’Aquiles. La mayoría d’empreses desdexa la calidá, orixinalidá y periodicidad na publicación de conteníos.
«Vivimos nuna redolada dixital, pero la mayoría d’empreses asturianes inda nun cumple cola primer reblagada: una web corporativa, con calter comercial y sofitada por una estratexa de comunicación online sólida y diferencial», argumentó José Luis Gil, coordinador del estudiu.
