La conseyera d’Educación, Cultura y Deporte, Ana González, señaló güei que la creación del consorciu garantiza la continuidá de la xestión pública de la rede d’escueles de 0 a 3 años y la collaboración ente l’Alministración educativa y los conceyos. “La rede tien que ser pública y creemos que’l consorciu ufierta una fórmula de xestión positiva, porque nos dexa siguir trabayando conjuntamente colos conceyos, que van tener una presencia significativa”, apuntó.
Ana González, qu’intervieno nel plenu de la Xunta Xeneral del Principáu, afirmó que los 508 técnicos n’Educación Infantil qu’empresten servicios nestos centros van integrar nel nuevu ente.
Al so xuiciu, el consorciu va favorecer l’accesu a les escueles de primer ciclu d’Educación Infantil en condiciones d’igualdá y va dexar algamar una mayor implantación del serviciu. Nesti sentíu, recordó que foi un gobiernu socialista’l que punxo en marcha la rede pública d’escueles de 0 a 3 años al traviés del Plan d’Ordenación d’Escueles de Primer Ciclu d’Educación Infantil, aprobáu pol Conseyu de Gobiernu’l 25 d’abril de 2002.
La conseyera destacó la orientación educativa d’esta etapa, que nun se plantega como un meru recursu asistencial, y sorrayó tamién el so altu valor social. Na actualidá funcionen n’Asturies 67 escueles de Primer Ciclu d’Educación Infantil en 38 conceyos.
Decretos de Primer Ciclu d’Educación Infantil
González informó de que’l Gobiernu autonómicu ta trabayando na ellaboración de dos decretos sobre la rede de 0 a 3 años. Per un sitiu, el que regula la ordenación académica del primer ciclu d’Educación Infantil y, por otru, el qu’establez los requisitos d’organización y funcionamientu de los centros.
L’oxetivu del decretu que regula la ordenación académica ye establecer los conteníos, orientaciones metodolóxiques y criterios pa evaluar el progresu del alumnáu en caúna de les árees. Pela so parte, la normativa pa ordenar la organización de los centros pretende llograr redolaes educatives calidable, compensadores de les desigualdaes personales, culturales y sociales, p’apurrir a los neños, en collaboración coles sos families, un procesu óptimo de desenvolvimientu de la so personalidá y capacidaes.
