La organización del Día’l traxe’l país’, que se va celebrar en Grao esti domingu 16 de octobre, estima que sobre unes 200 persones lluzan los sos traxes tradicionales a lo llargo de tola mañana. D’estes, 42 tán inscrites nel concursu ‘Indumentaria’, un certame que va empezar a les 11.00 hores na Plaza de los Dolores cola convocatoria de los participantes ante’l xuráu. A les 12:30 hores, va realizase’l desfile pal públicu na mesma plaza y, al terminar este, va dase pasu a la entrega de los premios.
‘Indumentaria’ consiste nuna amuesa de traxes calidable y un estímulu pa los meyor vistíos. Asina, el Día’l traxe’l país’ va axuntar en Grao a xente de toa Asturies y tamién visitantes de fora. Calcúlase qu’asistan más de 150 persones fora de concursu vistíes col traxe tradicional asturianu, dalgunas con traxes completos de finales del sieglu XIX. Esti númberu, sumáu a les 42 persones inscrites nel concursu, garantiza que Indumentaria 2016 sía un ésitu.
En cuanto al concursu puramente dichu, va empezar a les 11.00 hores cola convocatoria de los participantes na Capiya de los Dolores, onde van tener un momentu de convivencia col xuráu (formáu por Constantino Menéndez, Consuelu Riu, Fe Santoveña y Ana Villanueva, toos ellos espertos na materia) y una sesión de semeyes a cargu del estudio Güeyos de Lata.
A la fin del desfile conocerán los ganadores dientro de los dos categoríes _hombre y muyer_ que tien el concursu. Los primeros premios van llevar 200 euros y una lliga de llana esclusivo; los segundos, 150 euros, y los terceros, 100 euros. En total, 900 euros que patrocina Caxa Rural d’Asturies. Estos galardones van apurrir la conceyala de Festexos del Conceyu de Grao, Elsa Suárez, y el director de la sucursal de Caxa Rural d’Asturies na villa moscona, José Manuel Álvarez.
Tanto’l concursu como la xornada festiva polo xeneral van tar animaos con música y baille. Asina, va cuntase cola participación de la pareya de gaita y tambor formada por Arsenio González y Manolo Díaz, el violinista Dolfu Fernández y l’acordión d’Octavio Trapiello. Amás, collaborarán cola interpretación de delles pieces Xosé Antón Fernández ‘Ambás’ y Ramsés Ilesies.
