La Comisión Delegada de la Fundación de Cultura aprobó, por unanimidá, la creación d’una Comisión asesora que va ayudar a la Fundación a trazar les llínees de la programación y l’actividá cultural de la ciudá. Van Ser los grupos municipales con representación nel Consistoriu los encargaos d’alcordar el númberu y la composición de la mesma.
Los estatutos de la Fundación Municipal de Cultura namá contemplen, como únicu requisitu, que la comisión va deber de tener un máximu de cinco persones. El Conseyu Rector tamién aprobó la Cuenta Xeneral de la Fundación de 2015, por un importe total de 10.978.000 euros.
El Conseyu Rector de la Fundación Municipal de Cultura aprobó tamién un Conveniu cola Fundación Musical Ciudá d’Uviéu pa dotar a la Orquesta Uviéu Filarmonía d’un presupuestu de 2.766.690 euros. La entidá tamién dio’l vistu bonu a un conveniu cola Fundación Musical Ciudá d’Uviéu pa les actividaes de la Banda de Música Ciudá d’Uviéu, por valor de 604.832 euros.
Per otra parte, la Comisión Delegada de la Fundación Municipal de Cultura dio esti martes el vistu bonu al proyectu pa la celebración del Simposium internacional, que sol epígrafe ‘Reyes d’Asturies y los oríxenes del cultu a la tumba del apóstol Santiago’ va celebrase, del 13 al 16 de xunetu n’Uviéu, y que’l so presupuestu xube a 25.741 euros. La Comisión aprobó tamién el conveniu con Tribuna Ciudadana pa la organización de la convocatoria del 38º Premio Tigre Juan, dotáu con 50.000 euros.
