El Voceru del Grupu Parlamentariu de Ciudadanos na Xunta Xeneral del Principáu, Nicanor García presentó una Proposición Non de Llei pa encamentar al Gobiernu rexonal a qu’ellabore y presente nel plazu de seis meses un Plan estratéxicu del Camín de Santiago n’Asturies.
La iniciativa pretende aprovechar la recién declaración como Patrimoniu Mundial de les rutes xacobees de los Caminos del Norte’ con cuenta de poner en valor y potenciar esti conxuntu históricu, cultural, relixosu y turísticu.
«El Principáu tien de ponese a trabayar yá con vistes a nun perder la oportunidá que nos ufierta la celebración del próximu Añu Xacobéu nel añu 2021, y realizar les actuaciones necesaries pa garantizar non yá la promoción y espardimientu del Camín, sinón tamién un fayadizu acondicionamientu y señalización de les rutes que trescurren per Asturies», solicitó’l diputáu autonómicu.
Reclama amás la dotación d’equipamientos afecha, – como l’acondicionamientu y la señalización de les rutes del camín Primitivu o la creación de nuevos albergues-, «que dexe atender les necesidaes de los pelegrinos que transiten pola nuesa rexón, a lo llargo d’estos años, col fin d’amontar el turismu relixosu n’Asturies».
La Proposición Non de Llei contempla amás, ente otres cuestiones, la creación d’un Conseyu Asturianu del Camín de Santiago como órganu de calter consultivu pal diálogu, la participación y coordinación de toles actuaciones rellacionaes col mesmu y que se promueva la reconocencia oficial pa la incorporación a la Llista Indicativa d’España del Patrimoniu Mundial de la Unesco, como estensión de la recién declaración de los Caminos de Santiago del Norte Peninsular’ de les rutes xacobees al so pasu per Asturies.
Dende Ciudadanos consideren que’l Gobiernu rexonal nun tien de perder más tiempu en «poner en valor toos les posibilidaes que tien el Camín de Santiago del Norte, como exa de desenvolvimientu turísticu fundamental p’Asturies, y que potencie la restauración y caltenimientu del conxuntu históricu, cultural, relixosu y turísticu que suponen los nuesos monumentos».
