Correos punxo en marcha la so nueva páxina web sobre’l Camín de Santiago –www.elcaminoconcorreos.com–, qu’ufierta servicios como conseyos turísticos sobre les distintes localidaes que percuerre la ruta o’l treslláu de mochiles ente albergues pa pelegrinos.
En concretu, les suxerencies respectives al Camín fueron apurríes por más de 150 carteros de la empresa, que compartieron informaciones relatives a llugares desconocíos a lo llargo de la vía y los sos encamientos personales sobre agospeos y restoranes.
El portal dixital tamién dexa l’accesu a un blogue nel que se recueyen distintes postales del Camín. Otra de les posibilidaes qu’ufierta la páxina ye una recoyida y selección de fotografíes realizaes por pelegrinos que van poder incorporase a los distintos apartaos colos que cunta caúna de les rutes na web.
Igualmente, ufierta la posibilidá de contratar una tarxeta prepago non venceyada con una cuenta bancaria y que nun precisa tar activada de cutio, sinón que dexa faelo namá a la d’efectuar un abonu.
