El Conseyu de Gobiernu dio lluz verde a un modelu de conveniu de collaboración ente’l Principáu y les empreses comenenciudes pa crear venceyos de comunicación y actualizar la formación técnica del profesoráu de Formación Profesional.
Esta iniciativa pretende impulsar la cooperación ente los centros docentes y les compañíes, amás d’optimizar los recursos de formación per dambes partes y promover l’intercambiu de conocencies y esperiencies profesionales ente profesionales de la docencia y del mundu llaboral.
D’esta miente, el profesoráu y l’alumnáu de FP van poder aportar a información actualizada alrodiu de les postreres técniques desenvueltes nos sectores profesionales del so interés.
Les actividaes formatives van llevar a cabu nel marcu d’una programación que puede incluyir distintes acciones, como xornaes divulgatives o de puertes abiertes, cursos de formación específicos o acciones d’actualización.
