L’Axencia de Sanidá Ambiental y Consumu ta centralizando la tramitación de les reclamaciones de los afectaos pol zarru de la clínica iDental de Xixón coles mires de que les compañíes financieres asuman el pagu de la finalización de los sos tratamientos.
Recuérdase que nos casos nos que’l tratamientu financióse por aciu un creitu al consumu venceyáu con una entidá de creitu, como asocede cola mayoría de los veceros de Idental, y la clínica cierra o dexa d’emprestar el serviciu, el consumidor puede exercer los sos derechos énte la entidá de creitu.
Por esti motivu, l’Axencia de Sanidá Ambiental y Consumu ta esixendo a les entidaes financieres que suspendan de forma inmediata’l cobru de les cuotes del préstamu, propongan xuna solución alternativa pa rematar el tratamientu ensin costu adicional pal veceru y absténganse d’incluyir los sos datos en ficheros de impagados.
Con esti fin, esti organismu dependiente de la Conseyería de Sanidá encamienta presentar una reclamación énte’l Principáu d’Asturies, cubriendo’l formulariu que-yos van facilitar nes Oficines Municipales d’Información al Consumidor, el Serviciu d’Atención Ciudadana del Principáu d’Asturies o nes dependencies del Serviciu de Consumu. Tamién ta disponible na páxina web consumoastur.
A la reclamación tendrán d’axuntar copia de la documentación de que dispongan: presupuestu, contratu de financiamientu cola entidá de creitu, contratu con iDental, factures o recibos de pagos efectuaos y documentación clínica.
Énte l’eleváu númberu de denuncies recibíes, ye recomendable que los mesmos afectaos reclamen tamién a la financiera pa intentar llograr una respuesta más rápida.
En casu de que la financiera proponga xuna solución alternativa pa rematar el tratamientu, aconseyar al consumidor que solicite la ufierta por escritu y analice les sos condiciones en tientes antes d’aceptala.
Si nun se algamar un alcuerdu cola entidá financiera pa rematar el tratamientu, sería necesariu rescindir el contratu, cola devolución de les cantidaes que’l veceru hai abonáu por demás sobre’l tratamientu realmente recibíu. El Colexu d’Odontólogos y Estomatólogos d’Asturies ufiertó la so collaboración pa efectuar una valoración de los trabayos realizaos pa faer efectiva la reclamación.
Valoraciones gratuites
Delles clíniques dentales tán ufiertando a los afectaos efectuar una valoración gratuita de los tratamientos realizaos. En casu d’aceptar estes ufiertes, nun tien de roblar se nengún documentu ensin esaminalo previa y en tientes, p’asegurase de qu’esta ufierta altruista nun trai nueves obligaciones económiques.
Dende’l zarru de la entidá, l’Axencia de Sanidá Ambiental y Consumu ta asesorando a los afectaos, tramitando les sos reclamaciones énte les entidaes financieres y desenvolviendo un llabor de coordinación con distintes instituciones p’ayudar a los afectaos.
Asina, celebráronse xuntes colos responsables de la Oficines Municipales d’Información al Consumidor, en visu a ufiertar una respuesta unificada a los afectaos y establecer un protocolu d’actuación que dexe la tramitación de les sos reclamaciones.
Tamién se celebraron dos xuntes col Colexu Oficial d’Odontólogos y Estomatólogos, pa establecer los procedimientos de collaboración que dexen determinar cuálos de los trabayos presupuestaos fueron efectivamente realizaos.
Paralelamente, Consumu ta realizando xestiones p’asegurar la integridá y custodia de la documentación clínica de los pacientes y pa poner los fechos denunciaos en conocencia de la Fiscalía.
Amás celebróse una xunta cola plataforma d’afectaos colos que se caltienen contactos frecuentes pa informa-yos de les actuaciones que se tán llevando a cabu y ufierta-yos l’ayuda de l’Axencia de Sanidá Ambiental y Consumu.
