Conceyu por Otra Función Pública n’Asturies presentó ante’l Tribunal Cimeru de Xusticia d’Asturies (TSXA) un recursu contenciosu-alministrativu frente al Alcuerdu de la Mesa de la Cámara de la Xunta Xeneral del Principáu d’Asturies, adoptáu en sesión celebrada’l 29 de xunu de 2015, pol que s’aprueba la relación de puestos de trabayu de personal eventual, por entender que’l mesmu «incurre en graves irregularidaes que lo vicien de nulidá».
Señalen que la Mesa de la Xunta aprobó una relación de 48 puestos de trabayu de personal eventual «ensin definir les funciones que-yos correspuenden y que dexaríen la so configuración como puestos d’enfotu políticu como, per otra parte, esixe’l mesmu Reglamentu de la Cámara».
Esti incumplimientu», señalen dende Conceyu por Otra Función Pública n’Asturies, «resulta especialmente grave por cuanto que los llamaos asesores namá pueden desempeñar xeres de collaboración inmediata colos cargos políticos que los nomen, nes que predominen les notes d’afinidá y proximidá política que ye inherente l’enfotu y tienen prohibíes les actuaciones de collaboración profesional que son normales na actuación d’una Alministración Pública, que tienen de ser desempeñaes obligatoriamente por funcionarios públicos».
La relación de los 48 de puestos d’enfotu aprobáu pola Mesa de la Cámara inclúi secretarios de mesa (7), asesores de grupos parlamentarios(8), responsables de comunicación de grupos parlamentarios(6), secretarios de grupos parlamentarios (6), asistentes de grupos parlamentarios (10),auxiliares de grupos parlamentarios (7), más 4 puestos adscritos al gabinete de la Presidencia.
Amás señalen que l’alcuerdu de la Mesa de la Xunta «incumple les Normes Reguladores de la estructura orgánica de la Xunta Xeneral, que solo dexen nomar personal eventual p’asistir a el Vicepresidentes y a los Secretarios de la Mesa nel exerciciu de les sos funciones, pero non pa los vocales de la mesma como se fai de forma irregular en dichu alcuerdo».
A lo último, destaquen que la relación de puestos de trabayu del personal eventual «incumple la obligación de señalar les retribuciones complementaries que correspuenden a cada unu de dichos puestos».
