L’asociación Conceyu por Otra Función Pública n’Asturies fixo pública esti miércoles una nota de prensa na que se refier al nomamientu del nuevu xerente del Hospital Universitariu Central d’Asturies (HUCA) como una farsa» y una pantomima».
«La cadena de falacias en relación con esti asuntu nun dexa de crecer y agora invéntase un supuestu tribunal pantasma que fadría la propuesta del candidatu engraciáu al conseyeru de Sanidá», señalen.
Según Conceyu, el nuevu xerente va ser nomáu por llibre designación, esto ye, apreciando discrecionalmente la idoneidad pal puestu y escoyendo a aquel o aquella nel que’l conseyeru de Sanidá, Francisco del Busto, tenga «más enfotu personal».
L’asociación considera que nun sistema democráticu «mínimamente decente», el conseyeru de Sanidá yá sería citáu urxentemente en vía parlamentaria pa esplicar les xestiones paraleles» que podría ralizar y que «nun casen perbién colos principios d’igualdá, méritu y capacidá que tienen de rexir l’accesu a los puestos del sector públicu».
«Si la Conseyería de Sanidá negar a ufiertar los datos de los candidatos que se presentaron a la primer convocatoria, declarada erma, porque ello frayaba supuestamente la Llei de Protección de Datos, ¿la publicación qu’agora se fai de la identidá d’unu de los aspirantes , antes de rematar el procedimientu de provisión del puestu, infringe tamién esa mesma normativa?. Menuda farsa.», concluyeron dende Conceyu.
