L’asociación Conceyu por Otra Función Pública nAsturies (Cofpa) pidió esti miércoles al Gobiernu asturianu qu’esclarie la fecha na que fueron aprobaos los decretos de la nueva estructura del executivu, ante les contradicciones que detectaron na fecha que figura nel Boletín Oficial del Principáu d’Asturies (BOPA) y l’información oficial que ta treslladando’l Gobiernu rexonal.
Dende Cofpa esplicaron qu’el BOPA publicó’l 14 d’agostu los decretos roblaos pol presidente del Gobiernu asturianu, el socialista Javier Fernández, y que llevaben por fecha 13 d’agostu. Nel so testu señalaben que se dictaron previu alcuerdu del Conseyu de Gobiernu aconceyáu esi mesmu día, xueves.
Sicasí, na información sobre l’actividá del Gobiernu que figura na páxina oficial de l’Alministración del Principáu d’Asturies nun consta alcuerdu dalgunu de fecha 13 d’agostu, pero sí la relación d’alcuerdos del día 14 d’agostu, vienres, na que s’indica: «El Conseyu de Gobiernu aprueba la nueva estructura del Executivu autonómicu, que va tener ocho consejería dos viceconsejerías y 38 direcciones xenerales».
Por tanto, de conformidá cola información oficial del Gobiernu del Principáu’l Conseyu de Gobiernu aprobó les estructures orgániques de les conseyeríes el día 14 d’agostu y non el día 13, como figura nos ocho Decretos dictaos pol presidente.
Pa Cofpa, esti tracamundiu nes feches, llueñe de resultar anecdótica, afecta «a la seriedá y rigor llegal» col que tien d’actuar l’Alministración Pública y esixe una clarificación oficial. «La tan cacarexada tresparencia esixe lluz y taquígrafos pa esclariar esti misteriu de feches: el Conseyu de Gobiernu tien de faer pública l’acta na que se recueyen los alcuerdos d’aprobación de les nueves estructures orgániques de les conseyeríes. Cuánto antes meyor», remata Cofpa na nota de prensa que fixo pública.
