La xunta de gobiernu del Consorciu para la Xestión de Borrafes Sólides d’Asturies (Cogersa) aprobó güei el presupuestu para 2018, que xube a 6.846.246 euros. Nel capítulu d’inversiones conséñense primeramente 6.040.000 euros, que podríen alzase hasta los 10,4 millones con cambeos financiaos col remanente líquidu de tesorería.
Ente les actuaciones previstes destaca la continuación de la obra de la planta de compostaje de folles de depuradora, l’ampliación de la planta de clasificación d’envases llixeros del contenedor mariellu, l’aumentu de capacidá del depósitu de borrafes peligroses, la construcción de nuevos puntos llimpios, la meyora de la planta de tratamientu d’escombros y xuna primer conseñamientu pa los trámites iniciales de contratación d’una planta de clasificación de basura bruta, si esta inclúyese na futura planificación autonómica.
El principal órganu de gobiernu de Cogersa tamién aprobó la revisión de los precios polos servicios que s’empresten a los consistorios, a otres entidaes públiques (Cadasa y rede hospitalaria, principalmente) y a unes 1.300 empreses privaes, ente otros.
En relación colos conceyos, caltiense la gratuidá nel preciu de tratamientu (biometanización) de la fracción orgánica clasificada n’orixe, del compostaje de restos de fradadures y siegues de los parques y xardinos municipales y de los plásticos d’usu agrícola y ganaderu. Adicionalmente, cabo recordar el costu cero de la xestión de les borrafes que tán acoyíos a un sistema integráu (SIG), como asocede colos envases del contenedor mariellu, el papel y cartón, los botes y botelles de vidriu o los electrodomésticos.
La tarifa d’arramáu de la fracción resto incorpora la medría xeneral de precios (IPC) previstu pa 2018 y va xubir un 1,90% p’asitiase en 20,47 euros per tonelada. Amás, polo xeneral, pa tolos veceros y casi toles families de borrafes, la tarifa de tratamientu va esperimentar la mesma medría.
Nuevu presidente del consorciu
Per otra parte, el conseyeru d’Infraestructures, Ordenación del Territoriu y Mediu Ambiente, Fernando Lastra, foi escoyíu güei presidente de Cogersa y de la so sociedá instrumental: Cogersa SAU. L’alcuerdu foi tomáu por folgosu mayoría na xunta de gobiernu de la entidá, onde tán representaos tolos conceyos y l’Alministración autonómica.
Dende la so creación en 1982, el consorciu tuvo presidíu pol conseyeru del ramu.
En prometiendo’l so cargu, Lastra manifestó’l so prestu por recibir l’enfotu de la xunta de gobiernu y realizó un llamamientu por que los conceyos, el Principáu y Cogersa sigan trabayando xuntos polos oxetivos qu’establez la lexislación vixente en relación col reciclaje
