Los sindicatos CCOO y UXT solicitaron una xunta urxente col embaxador d’Italia n’España pa llograr qu’Endesa merque carbón autóctono, ante la «desidia» del Gobiernu del PP en relación cola minería.
Nuna nota de prensa conxunta, dambos sindicatos punxeron de manifiestu la urxencia» de que la eléctrica pública italiana ENEL (antigua Endesa) «reaccione» pa da-y un respiru y un futuru» al sector, una y bones «l’agonía pola que traviesa la minería del carbón rique midíes estraordinaries y urxentes».
Por ello, UXT FICA y CCOO d’Industria decidieron solicitar al máximu responsable del Gobiernu d’Italia n’España, el so embaxador, una xunta urxente pa espone-y la situación actual de paralís de compra de carbón nacional per parte de la empresa pública. El so oxetivu ye «llograr que interceda por que la eléctrica merque’l carbón necesario nes sos centrales térmiques n’España».
Asina se va solliviar el problema hasta que’l Gobiernu de vez cumpla lo alcordao y ufierte una solución definitiva», señalaron. Na xunta, les organizaciones sindicales convocantes van esplicar la situación pola que traviesa’l sector y les contornes mineres, «en riesgu d’una puesta desapaición pola irresponsabilidá del actual Gobiernu español, qu’incumple lo alcordao nel Marcu d’Actuación pa la Minería del Carbón, y que nun s’axunta colos axentes sociales dende fai yá más de quince meses».
CCOO d’Industria y UXT FICA confíen en qu’estes esplicaciones sirvan pa desbloquiar la compra de carbón y, con ello, poder siguir intentando una solución vidable al sector del carbón autóctono y a les contornes mineres.
Nel so comunicáu, dambes formaciones quixeron destacar el comportamientu del secretariu d’Estáu d’Enerxía, Alberto Nadal, y del Gobiernu d’España, «que siguen trabayando pa la definitiva desapaición del sector del carbón y convertir en guetos a les contornes mineres del país».
