La Estaya de la Llingua del Conceyu d’Avilés entama 3 visites empuestes n’asturianu, gratuites, a llugares emblemáticos del Conceyu. Col títulu de ‘CaleyAvilés’, van visitase los espacios que vienen de siguío: sablera de San Xuan, dunes de L’Espartal y llamarga de Zeluán, parque La Ferrera y cascu históricu de la ciudá.
Les visites empiecen esti vienres na sablera de San Xuan, dunes de L’espartal y llamarga de Zeluán. les persones aprticipantes van entender d’una manera senciella la dinámica costera y los distintos ambientes costeros de la zona: estuarios, marismas, sablera y dunes. Les expliaciones van correr al cargu de Verónica Álvarez Cachafeiro, xeóloga, empón-intérprete del patrimoniu y consultora de mediu ambiente, turismu y desenvolvimientu rural.
Ta prevista la salida n’autobús a les 16:30 hores dende Avilés hasta la sablera de San Xuan onde va tar esperando la guía de mano la visita a les 17:00 hores. La duración ye de tres hores y media. Cuando se termine la visita, a als 20:30, recoyida de visitantes na sablera de San Xuan y vuelta n’autobús en dirección a Avilés. Encamiéntase llevar calzáu cómodo. El Puntu d’alcuentru: El Carbayedo (delantre de Casa Tataguyo).
Les demás visites programaes p’anguaño son el llunes, día 29 d’agostu, de 17.30 a 19.30. Tratar de la visita empuesta pol parque La Ferrera. Podrán vese los árboles más emblemáticos de la nuesa cultura: carbayos, texos, castañales, etc. Tamién vamos afayar la importancia que tuvieron y que tienen na hestoria d’Asturies, creencies y cultura asturiana alredor d’ellos. Puntu d’alcuentru: Edificiu La Noria (dientro del mesmu parque).
Xueves, día 29 de setiembre, de 17.30 a 19.30 hores va ser la visita empuesta pol cascu históricu de la ciudá, incluyendo la capiya de Les Nales. La hestoria d’una ciudá milenaria, al traviés de los sos monumentos. Puntu d’alcuentru: Delantre de la puerta del Conceyu (El Parche).
