El Conceyu por Otra Función Pública n’Asturies afirmó que les retribuciones de los 41 asesores d’enfotu políticu «nomaos a deu» pol Gobiernu de Javier Fernández tres les elecciones del pasáu mes de mayu, xuben a un total de 1.685.931,32 euros. Esta cifra supon un aumentu en 5.428,44 euros respecto del importe total de les retribuciones que se pagaben al mesmu númberu d’asesores antes de les elecciones.
Conceyu por Otra Función Pública n’Asturies, basándose na información que s’acaba de publicar nel llamáu ‘Portal de tresparencia’ del Principáu d’Asturies, señala que se trata d’una medría del gastu que revela’l sentíu de la política sobre l’empléu públicu que tien el Gobiernu asturianu».
«Mientres esta Comunidá Autónoma niega’l pagu d’una parte proporcional de la paga extra debida a los sos emplegaos públicos, a diferencia de lo que fixeron yá once Comunidad Autónomes, nun atopa inconveniente dalgunu n’aumentar les retribuciones d’un grupu privilexáu del so enfotu políticu», añeden.
Nesta relación de puestos d’asesores, l’asociación considera «escandalosos» dalgunos d’ellos y destaca que’l presidente del Principáu «tien trés asesores col nivel 30, el máximu nivel retributivo nel empléu públicu, nivel que solo tienen seis jefatura de serviciu. ¿Para qué precisa y a qué dedica’l presidente del Gobiernu esta guardia pretoriana colos salarios más altos de l’Alministración Pública?».
Alverten tamién de que la Conseyería de Presidencia tien un total d’ocho asesores. «¿Qué trabayos d’enfotu políticu realiza esti ampliu grupu d’allegaos que nun puedan ser desenvueltos por funcionarios públicos?», pregúntense.
El Conceyu por Otra Función Pública n’Asturies considera que «esti sistema de reclutamiento masivu d’asesores d’enfotu al marxe de los principios constitucionales d’igualdá, méritu y capacidá, ye una borrafa antidemocrática del caciquismu políticu del sieglu XIX, que nun tuviera de tener cabida nun Estáu que se diz Democráticu y de Derechu».
