El conseyeru de Presidencia y Participación Ciudadana, Guillermo Martínez, señaló güei qu’Asturies ye la cuarta comunidá autónoma que más invierte en xusticia gratuita por habitante, con una media de 4,97 euros, percima del promediu d’España (4,87 euros) y solo por detrás de Cataluña (6,90 euros), Canaries (6,97 euros) y País Vascu (5,89 euros).
El fortalecimientu d’esti serviciu constitúi una de los grandes apuestes del Executivu autonómicu, tantu nes partíes presupuestaries (un 67,6% de medría nel periodu 2012-2016), como na axilización de les subvenciones a los profesionales, lo que se tradució nun amenorgamientu de los tiempos pa materializar los pagos (un máximu de tres meses).
L’asistencia xurídica gratuita ye una subvención que s’abona a los colexos abogaos y procuradores, previa solicitú d’estos, a trimestres vencíos, una modalidá regulada por llei y reglamentada por un decretu. Ye, poro, una subvención a corporaciones de derechu públicu, como son los colexos profesionales, y non l’abonu d’una factura por servicios emprestaos a l’alministración pública.
El titular de Presidencia destacó estos datos na presentación del serviciu d’orientación xurídicu-llaboral gratuitu que va poner en funcionamientu esti semestre n’Uviéu’l Colexu Oficial de Graduaos Sociales d’Asturies.
Mientres l’actu, nel que tamién participó’l presidente de la entidá, Francisco Antonio Martos, esplicaron que la oficina va ser atendida polos mesmos colexaos, que van ufiertar atención profesional en materies de derechu llaboral o de seguridá social a trabayadores per cuenta ayena, pensionistes, paraos o estranxeros. El serviciu va incluyir un mecanismu pa la solicitú de cita previa.
Guillermo Martínez felicitóse pola puesta en marcha d’esti dispositivu, que venceyó al modelu de xusticia gratuita que defende’l Gobiernu del Principáu pa garantizar a les persones con menos recursos l’accesu a unu de les pilastres básiques del Estáu social y democrático: la defensa xurídica.
Meyores ensin l’ayuda del Gobiernu central
Nesti sentíu, el conseyeru destacó que toles meyores impulsaes pol Executivu autonómicu nesti campu pudiéronse algamar gracies al permanente diálogu y cooperación colos colexos d’abogaos y procuradores y los esfuerzos que lleven a cabu estos colectivos profesionales.
Nos últimos cuatro años, el Gobiernu d’Asturies destinó al pagu de la vez d’oficiu 21,6 millones d’euros, a los que se suman otros 2,8 abonaos mientres esti exerciciu. La cifra global xube a 24,4 millones.
Martínez sorrayó que l’Executivu rexonal fixo l’esfuerzu ensin l’ayuda del Gobiernu central, a pesar de qu’ésti recaldó dende entós 10,74 millones en conceutu de tases xudiciales, cuantía que tendría de ser tresferida a la comunidá autónoma pal pagu de l’asistencia xurídica gratuita.
