La conseyera de Agroganadería y Recursos Autóctonos, María Jesús Álvarez, informó güei de qu’Asturies va recibir 24,6 millones d’euros del Fondu Européu Marítimu y de Pesca (FEMP) pal períodu 2014-2020. “Esta cantidá va dexar caltener los actuales ritmos d’inversión na modernización de la flota asturiana y responder tamién a les demandes de los sectores de la acuicultura, el tresformamientu y la comercialización”, indicó.
Tamién esplicó que les paralizaciones definitives, que se van caltener hasta 2017, van correr al cargu de la Alministración Xeneral del Estáu y non de les comunidaes autónomes, como asocedía hasta agora.
Álvarez participó esta tarde en Madrid na xunta de la Conferencia Sectorial de Pesca, na que s’encetaron los criterios de repartida del Fondu Européu Marítimu y de Pesca hasta 2020 y la propuesta de distribución ente les autonomíes.
A xuiciu de la titular de Agroganadería, la repartida “dexa a toles comunidaes razonablemente insatisfeches, porque hai menos presupuestu”. Amás, la conseyera amosóse crítica col fechu de que’l ministeriu acutárase más fondos, en desterciu de les autonomíes. Concretamente, al Principáu corresponderán-y 24,6 millones frente a los 39,9 asignaos nel períodu del Fondu Européu de la Pesca (FEP) qu’agora remata.
Sicasí, precisó que la nueva propuesta de distribución realizóse en función de criterios oxetivos, como’l pesu de la flota pesquera, el valor económicu de la producción y el númberu d’empleos, amás de la execución proxectada a 31 d’avientu del próximu añu– del actual FEP.
El FEMP destina a España pal períodu 2014-2020 un total de 1.161.620.889 euros, de los que se dediquen 929.282.439 al desenvolvimientu sostenible de la pesca, acuicultura y árees de pesca, comercialización y tresformamientu, daqué menos que nel anterior fondu, que cuntaba con 1.131 millones. D’esos 929 millones, acútense 719 pa les comunidaes y el restu queda asignáu pa la xestión de l’Alministración Xeneral del Estáu.
Mientres l’alcuentru celebráu esta tarde, la conseyera tamién aportunó na necesidá de que el pescadores asturianos dispongan de más cuota na captura de merluza.
PAC
Álvarez, qu’asistió amás a la xunta de la Conferencia Sectorial d’Agricultura, criticó que nun se modificó nengunu de el borradores del real decreto sobre l’aplicación de la Política Agrícola Común (PAC) p’atender suxerencies de la Comisión Europea en cuestiones clave como’l modelu de comarcalización, la definición de llabrador activu y los pagos acoplaos.
Coles mesmes, reprochó al ministeriu que presentara nuevos documentos del modelu d’aplicación de los pagos directos de la PAC y que les comunidaes nun tengan plazu pa presentar allegamientos nin suxerencies. “La reforma de la PAC ye una ocasión perdida, porque nun reconoz a los sectores y nun tien en cuenta l’empléu nin les zones d’agricultura de monte”, llamentó.
