El Gobiernu d’Asturies comparte la so esperiencia en materia de regulación de viviendes d’usu vacacional nel Congresu Internacional de Turismu Interior, que se clausura güei en Plasencia (Estremadura), onde tamién se presentó la campaña Vuelve al Paraísu como exemplu de promoción turística dixital.
El director xeneral de Comerciu y Turismu, Julio González Zapico, esplicó la puesta en marcha nel Principáu del Decretu de Viviendes Vacacionales y Viviendes d’Usu Turísticu, que cunta col sofitu de la mesa de concertación, el Conseyu Consultivu y el Conseyu Asesor de Turismu, nel que s’integren tolos grupos parlamentarios.
Anguaño, n’Asturies hai más de mil viviendes vacacionales y d’usu turísticu. “Son un millar d’establecimientos qu’agora sí garanticen al usuariu un serviciu seriu, acorde con un destín que creció y que quier siguir creciendo alzando la bandera de la calidá”, sorrayó’l director xeneral.
Zapico detalló’l procesu d’ellaboración de la normativa autonómica na mesa redonda Estratexes contra los agospiamientos illegales, onde informó de que dende xineru hasta agostu la Conseyería d’Empléu, Industria y Turismu realizó 3.000 inspecciones, casi tantes como tol añu pasáu. Del total, 1.021 fueron para detectar la prestación de servicios turísticos clandestinos y derivaron na apertura de 642 espedientes sancionadores.
Tamién señaló que’l Principáu abrió una llínea d’inspecciones al traviés d’internet que se saldó con más de 700 anuncios revisaos n’una decena de portales. Tres esti analís, unviáronse requerimientos a les plataformes colos incumplimientos reparaos y llogróse, pel momento, la retirada de más d’un centenar d’anuncios d’arriendos illegales.
El Principáu tamién presentó nel Congresu de Turismu Interior la campaña Vuelve al Paraísu como exemplu de promoción dixital, yá que apuesta per estos medios como elementos d’espardimientu estratéxicu con un mensaxe unificáu al traviés de prensa y revistes online, campañes temátiques segmentadas por mercaos ya intereses, acciones en buscadores y una presencia bien intensa en redes sociales. Amás, les canales que Turismu d’Asturies abrió anguaño en Facebook n’inglés, francés, alemán, portugués ya italianu reforzaron la visibilidá de la campaña nel mercáu internacional.
