Asturies consolidóse como líder nacional en turismu rural mientres los meses de xunetu y agostu, llegando a contabilizar más de mediu millón de pernoctaciones pel branu (504.383), lo que supon una medría interañal del 12,4% y les meyores cifres del país. Asina lo resaltó güei el conseyeru d’Empléu, Industria y Turismu, Isaac Pola, que presentó los últimos datos publicaos pol Institutu Nacional d’Estadística.
Más de 112.000 persones escoyeron los agospiamientos rurales asturianos pa les sos vacaciones branices, un 11,4% más que nel mesmu periodu del añu pasáu. Amás, esti tipu d’ufierta turística algamó medríes del 21,6% y del 45,7% en visitantes estranxeros y les sos correspondientes pernoctaciones.
“Unu de los indicadores más plausibles ye la medría del empléu nun 6,9%, especialmente naquellos subsectores que garanticen mayor equilibriu territorial y qu’aspiren a alzase nun factor de fixación de la población nel ámbitu rural”, destacó’l conseyeru. Bastante ye que, la creación de puestos de trabayu acomuñaos al turismu rural aumentó un 15,8% con respectu al branu de 2016.
Nel balance xeneral del periodu branizu teniendo en cuenta tou les tipoloxíes d’agospiamientu, Asturies ameyoró les sos pernoctaciones nun 2,9% hasta raspiar los 2,5 millones (2.456.944). Tamién xubió’l gastu turísticu nun 8%, asitiándose en 584,58 euros per persona y viaxe.
Nel acumuláu del añu, el turismu rural asturianu caltiense como destín preferíu del norte, con 732.503 pernoctaciones y 203.041 turistes ente xineru y agostu, lo que supon medría del 16% y 17,8%, respectivamente, con al respective de les cifres alcanzaes nel mesmu periodu del pasáu añu. Hoteles, apartamentos y campings suman coles mesmes más visitantes y estancies qu’en 2016, l’añu récord del turismu n’Asturies, creciendo en global un 5 y un 6%, en cada casu.
En palabres de Isaac Pola, “esti enclín positivu respuende a un plan de promoción eficaz, alliniáu colos oxetivos del Programa de Turismu Sostenible, xuna estratexa online integral y de optimización de recursos”.
Campaña de desestacionalización
Precisamente sobre la base del Programa de Turismu Sostenible 2020 diseñóse’l plan d’acciones de promoción turística pal últimu cuatrimestre, que’l so oxetivu postreru ye la desestacionalización. Asina, el Principáu va invertir 1.800.000 euros hasta finales d’añu pa promocionar Asturies nos mercaos nacional ya internacional mientres la próxima temporada media y baxa.
“La estratexa de la campaña n’España ye reforzar les acciones de comunicación nos mercaos de proximidá: Euskadi, Galicia y Castiella y Llión, amás de Madrid y Barcelona. N’Asturies –segundu mercáu pa los agospiamientos asturianos- tamién se va realizar xuna campaña pa impulsar les escapaes de fin de selmana dientro de la rexón”, destacó’l conseyeru.
La campaña Vuelve al Paraísu va saltar la próxima selmana a la televisión nacional, amás de tar yá presente en revistes, prensa y dellos soportes llamativos como 50 autobuses de Alsa o’l intercambiador de Moncloa, en Madrid, que les sos puertes, lones, suelos y escaleres llucen anguaño imaxes d’Asturies p’animar a los madrilanos a escapase al Principáu.
Coles mesmes, planiáronse 18 acciones de promoción y sofitu a la comercialización, la mayoría en mercaos internacionales. Destaquen l’asistencia a la feria World Travel Market de Londres, presentaciones en centros comerciales de Portugal y nel alcuentru añal d’axencies de Reinu Uníu, y la participación d’Asturies nel estrenu del documental Cantábricu en Londres, previstu pal 16 de payares na academia del cine británica, el conocíu BAFTA. Alemaña, Francia, Italia y México son otros mercaos nos que se va promocionar al Principáu mientres esta seronda, al traviés de viaxes de periodistes y otros prescriptores de viaxes.
Pola sorrayó’l pesu de la promoción online nel plan del últimu cuatrimestre, qu’inclúi campañes segmentadas por intereses y públicos, y intensificación de l’actividá en redes sociales. La web www.turismoasturias.es va estrenar un nuevu diseñu dafechu afechu a la campaña Vuelve al Paraísu pa potenciala.
El titular de Turismu avanzó tamién los grandes proyectos pal próximu añu nos que yá trabaya’l so departamentu: 9 planes de promoción temáticos estructuran la estratexa de marketing de 2018, na que se van poner en marcha, ente otres, acciones de profesionalización y talleres con colectivos profesionales rellacionaos con dellos productos como’l Camín de Santiago, ecoturismo y turismu activu y deportivu. Cuadonga 2018 va tener tamién la so propia campaña, que’l so conteníu, consensuáu yá pol Gobiernu del Principáu, l’Arzobispáu y el Conceyu de Cangues d’Onís, va dar a conocer llueu.
