El Gobiernu d’Asturies publicó güei nel Boletín Oficial del Principáu (Bopa) la concesión de 8.755.000 euros n’ayudes a la rehabilitación de viviendes, que van beneficiar a 147 comunidaes de vecinos para la execución d’obres de meyora na accesibilidá y na eficiencia enerxética de los sos inmuebles.
Acordies con los proyectos presentaos, el total d’actuaciones previstes al amparu d’estes subvenciones va dexar movilizar más de 40 millones.
Esta convocatoria d’ayudes cuntaba primeramente con un presupuestu de 6,5 millones, alcordáu nel plan de vivienda estatal, que’l Gobiernu rexonal aumentó darréu con 2.255.000 euros más para ampliar el númberu de beneficiarios.
El director xeneral de Vivienda, Fermín Bravo, destacó l’esfuerzu presupuestariu lleváu a cabu pol Principáu, que s’asitia ente les trés comunidaes autónomes que más fondos dediquen a les polítiques de rehabilitación.
L’Executivu asturianu consolida con estes ayudes el so sofitu a la rehabilitación d’edificios que, xuntu coles subvenciones de la Conseyería de Servicios y Derechos Sociales a la eliminación de barreres arquitectóniques y la meyora de la eficiencia enerxética, redunden nuna mayor calidá de vida y nuna meyora medioambiental, de la qu’incentiven l’actividá económica de la comunidá.
