El Gobiernu del Principáu tamién aprobó la concesión d’una ayuda d’emerxencia de 70.000 euros al comité español de l’Axencia de la ONU pa los refuxaos (ACNUR) p’atender a la población abelugada que llega a Europa al traviés del Mediterráneu. Esta acción humanitaria va dexar la rehabilitación básica de cuatro edificio abandonaos con capacidá p’atender a 600 persones na isla griega de Lesbos, zona de llegada masiva de población movida.
L’asistencia a poblaciones en situación d’emerxencia o de riesgu ye unu de los principios rectores de la cooperación asturiana. Y asina se reflexa na Llei del Principáu d’Asturies de Cooperación al Desenvolvimientu y nel Plan Director de Cooperación 2013-2016. Dende 2012, el Gobiernu del Principáu contribuyó a les necesidaes de la población abelugada con un importe global que xube a 281.125 euros.
El conflictu de Siria provocó’l desplazamientu de cuatro millones de persones, según Naciones Xuníes. Dende empiezos de 2015, la crisis agravóse de forma considerable convirtiéndose acaldía nuna situación más alarmante. El Gobiernu d’Asturies entiende que la necesidá más urxente ya inmediata, en reconocencia a dereches d’asilu y protección internacional que recueye la Convención de Xinebra y la Carta Europea de Derechos Humanos, ye asegurar un abelugu y l’atención médica básica por que les persones más vulnerables puedan sobrevivir a enfermedaes o mancadures que sufrieron nos sos desplazamientos.
