El Gobiernu del Principáu y la Xunta d’Andalucía reclamaron güei al Ministeriu de Sanidá, Servicios Sociales ya Igualdá qu’habilite de forma inmediata un fondu económicu que garantice un accesu equitativo a les melecines innovadores y una estratexa de control de precios pa evitar situaciones de oligopolio nel sector.
En declaraciones a los medios de comunicación antes de participar nel Conseyu Interterritorial del Sistema Nacional de Salú, el titular de Sanidá, Faustino Blanco, valoró que’l Gobiernu central corrixera la so posición errática respectu al tratamientu de la hepatitis C y alcordara desenvolver un Plan Estratéxicu Nacional pal Abordaxe de la enfermedá. Blanco sorrayó qu’esti documentu, esixíu per Asturies y Andalucía y que se va iguar col sofitu de les sociedaes científiques, les autonomíes y les organizaciones de pacientes, va dexar avanzar na eliminación de la infección y establecer midíes que fomenten la prevención y la detección precoz, y que garanticen el tratamientu coles melecines prescrites polos profesionales sanitarios, acordies con les indicaciones d’un comité técnicu.
Nesti sentíu, aludió a la necesidá d’actualizar los protocolos y d’afitar los criterios polos que se va emponer el Sistema Nacional de Salú a la d’introducir y suministrar de forma axilosa les nueves terapies que, en determinaos supuestos, simplifiquen el tratamientu y aumenten les tases de sanamientu.
Blanco aportunó en que se trata d’un problema de salú pública de calter global que rique la implicación del restu d’estaos de la Unión Europea pa desenvolver una iniciativa conxunto y coordinao que dexe introducir nueves xeneraciones de fármacos innovadores ensin comprometer la viabilidá de los sistemes sanitarios públicos y primando los criterios d’eficiencia, eficacia y equidad. Por ello, Asturies y Andalucía van encamentar al Gobiernu d’España a que solicite la interlocución de les instituciones europees ante la industria farmacéutico.
Mientres s’avanza nesti sentíu, dambos executivos van siguir trabayando por que nenguna persona enferma quedar ensin la medicación más fayadiza a la so situación por causes económiques. “La nuesa voluntá ye siguir prescribiendo les melecines contra la hepatitis C y entainar razonablemente los tratamientos y el control rigorosu de les terapies”, señaló Blanco.
Nesti sentíu, el Principáu constituyó en 2013 una Comisión d’Usu Racional de les Melecines y Productos Sanitarios (CURMP) col fin d’asegurar la calidá de la prestación farmacéutica y garantizar que tolos ciudadanos tengan igual accesu a la melecina que precisen, cuando y onde lo precisen, en condiciones d’efectividá y seguridá.
Asturies y Andalucía reclamaron tamién un marcu de financiamientu estable y equitativo, tantu pal tratamientu de los posibles casos de ébola, como pa la universalización de la vacuna del neumococu. “Falamos en tolos casos de problemes de salú pública nacional, nel casu del ébola competencia esclusiva de Sanidá Esterior, polo que querer echar balones fuera y delegar el so financiamientu nes comunidaes ye un exemplu más de les polítiques errátiques a les que nos tien acostumaos el Gobiernu de Mariano Rajoy”, llamentó’l conseyeru.
Coles mesmes, confió en que’l nuevu ministru de Sanidá, Servicios Sociales ya Igualdá, Alfonso Alonso, vire l’aldu y allóñese de la sienda de retayos y privatizaciones qu’atenta contra’l principiu d’universalidá de la sanidá pública.
