El Gobiernu aprobó los precios de les estaciones ivernices de Valgrande-Payares y Fontes d’Iviernu pa la temporada d’esquí 2015-2016, que se va estender dende’l 3 d’avientu hasta’l 3 abril, auque tantu la fecha d’entamu como la de zarru van depender de les condiciones meteorolóxiques y la disponibilidad presupuestaria.
Les nueves tarifes suponen la conxelación de los precios públicos na mayoría de los forfaits. N’otros casos, como los abonos de dellos díes, el costu xubió menos del 2% y nun supera los precios de la estación lleonesa de San Isidro.
Pa esta temporada caltien el conveniu cola Diputación de Llión, qu’habilita la vienta del forfait Cuatro díes, cuatro aparques, y el descuentu del 20% nel del día pa los abonaos de temporada añal en cualesquier de les otres estaciones.
Tamién se caltienen les principales novedaes de la temporada anterior, como’l descuentu de forfait pa los beneficiarios del Carné nuevu del Principáu y que computen como temporada alta solo los díes festivos de Selmana Santa, en llugar de too el períodu vacacional.
Amás, y pa fomentar y promocionar les estaciones fora d’Asturies, caltiense’l forfait Interadministraciones, que va dexar a otros organismos o entidaes públiques beneficiase d’un descuentu, siempres y cuando participen na actividá un mínimu de 150 esquiadores.
