El Principáu decidió xuntase a la primera adenda del conveniu de collaboración que caltienen el Ministeriu d’Educación, Cultura y Deporte y l’empresa Samsung pa l’aplicación del proyectu Samsung smart school, pa promover l’aplicación didáctica de les nueves tecnoloxíes nes aules.
Esta multinacional desenvuelve, dientro de los sos programes de responsabilidá social corporativa, el proyectu Samsung Smart School, dirixíu a centros públicos de Primaria allugaos n’árees con necesidaes especiales, pa impulsar l’aprendizaxe al traviés de la tecnoloxía móvil. En virtú del conveniu de collaboración suscritu col ministeriu, la compañía enllantó gratuitamente 30 aules tecnolóxiques en centros educativos públicos de distintes comunidaes nel cursu 2014-2015.
Pela so parte, la Conseyería d’Educación xuntóse’l 27 d’abril de 2015 al conveniu ente dambes entidaes, lo que favoreció que s’instalaren dos aules Samsung Smart School nel Colexu Rural Arrexuntáu (CRA) de Villayón, centru d’especiales necesidaes pol so allugamientu xeográfica.
El pasáu 27 d’ochobre, Samsung y el ministeriu roblaron la primera adenda al conveniu col propósitu de siguir col proyectu empecipiáu’l cursu anterior nos centros escoyíos y amplialo a otros nuevos. L’adhesión del Principáu a esta primera adenda dexa la implantación, esti cursu, d’una nueva aula Samsung Smart School nel Colexu Públicu Rioturbio, de Mieres.
