La conseyera de Agroganadería y Recursos Autóctonos, María Jesús Álvarez, defendió güei el nuevu Plan de Xestión del Llobu y sorrayó que’l testu consensuáu cumple col doble oxetivu de “caltener la especie y prevenir y embrivir los daños que sufren los ganaderos”.
“El plan va aplicase nel plazu más curtiu posible y ye una bona noticia que fuéramos capaces de revisar el documentu incorporando meyores midíes pa caltener la especie y tamién pa controlala de forma fayadiza”, esplicó.
Álvarez tamién llamentó les crítiques de los conservacionistas al testu y señaló que los representantes d’estos grupos nun asistieron ayeri a la xunta del Conseyu del Llobu na que se dio’l vistu bonu al documentu. Al so xuiciu, “sería preferible que nun fixeren desdexación de la so responsabilidá y plantegaren los sos argumentos nel senu del conseyu del que formen parte y al que tradicionalmente nun asisten”.
El nuevu Plan de Xestión del Llobu, que va sustituyir al aprobáu en 2002, va pasar agora al Conseyu Consultivu, como trámite preceptivu antes de la so aprobación definitiva per parte del Conseyu de Gobiernu.
Recuperación de la pita pinta
La titular de Agroganadería y Recursos Autóctonos realizó güei estes declaraciones antes d’asistir nel Colexu Públicu Baudilio Pládanu al actu de presentación del proyectu Pon una incubadora nel to cole, qu’impulsen la Fundación Caxa Rural d’Asturies y l’Asociación pa la Recuperación de la Pita Pinta.
María Jesús Álvarez felicitó a toles partes implicaes nesta iniciativa, que va dexar a los alumnos vivir directamente’l procesu de nacencia d’un pitín. Coles mesmes, destacó la importancia de que los neños conozan el cuidu de los animales, especialmente nesti casu, una y bones la pita pinta ye una raza asturiana en peligru d’estinción.
