La Conseyería de Agroganadería y Recursos Autóctonos, al traviés de la Dirección Xeneral de Política Forestal, invirtió 223.068 euros en dos tales obres de meyora de caminos nos conceyos de Pravia y Les Regueres.
La titular d’esti departamentu, María Jesús Álvarez, comprobó güei la resultancia de dambes actuaciones y sorrayó el compromisu del Gobiernu del Principáu col mediu rural. “Estes obres ameyoren la comunicación de los núcleos rurales y l’accesu a les finques, de cuenta qu’aumenten tamién la calidá de vida de los vecinos de Pravia y Les Regueres”, señaló.
Agroganadería destinó 142.646 euros a los trabayos de meyora del accesu al núcleu rural de Ablanedo, nel conceyu de Pravia. L’actuación consistió n’ameyorar el camín dende la carretera que xune Villarigán col conceyu de Cuideiru, nun tramu de 1.127 metros qu’agora dispon d’un anchu de cuatro metros. La empresa Alvargonzález Contrates foi la encargada d’executar les obres, qu’implicaron una escavación de casi 500 metros cúbicos pa enanchar el camín. En total, utilizáronse 750 metros cúbicos de zahorra artificial.
Per otra parte, l’actuación realizada pola Dirección Xeneral de Política Forestal nel conceyu de Les Regueres, na que s’invirtieron 70.422 euros, consistió na meyora del camín rural que xune los pueblos de Les Cruces y Premió. Asina, actuóse nun llargor de 1.025 metros p’ampliar la plataforma hasta consolidar una capa de rodadura de 3,5 metros, afirmada principalmente con zahorra natural, lo que facilita l’accesu a numberoses finques de llabor y usu agrariu. Nesti casu, la empresa axudicataria de los trabayos foi la sociedá cooperativa Forestal Salense.
