El presidente del Principáu, Javier Fernández, va axuntar mientres les próximes selmanes con el xefes de gobiernu d’Aragón y Castiella y Llión para encetar la situación de la minería y de les centrales térmiques. L’alcuentru forma parte del abanicu d’iniciatives que va esplegar l’Executivu autonómicu para encarar dambes cuestiones y que güei foi analizáu pol Conseyu de Gobiernu.
La empresa Iberdrola anunció’l 10 de payares el zarru de les centrales térmiques de Lada, en Llangréu, y de Velilla del Ríu Carrión, en Palencia. Esta decisión amenó’l refugu tantu del Gobiernu d’Asturies como del de Castiella y Llión. Pela so parte, l’Executivu aragonés tamién ta en contra de la clausura de la central turolense d’Andorra, prevista por Endesa para 2020.
El Principáu considera que 2018 va ser un añu clave para diseñar el procesu de transición enerxética n’España. A xuiciu del Executivu asturianu, el progresivu amenorgamientu d’emisiones de carbonu, rellacionaes col calentamientu global, nun tien de faer se de manera azotada y ensin reparar nes consecuencies que traería un zarru precipitáu de les térmiques. Amás de los empleos directos –Lada da trabayu a unes 90 persones-, hai que sumar los indirectos (por casu, los de les empreses de tresporte); les repercusiones sobro l’actividá d’El Musel, que tien nel tráficu de graneles xuna de les sos principales actividaes, y la previsible medría del preciu de la enerxía, importante pa les industries electrointensivas asitiaes n’Asturies.
Xuntu cola transición enerxética, esti exerciciu va ser tamién decisivu pa les esplotaciones mineres, yá que conforme a la Decisión 2010/787 del Conseyu Européu’l 31 d’avientu d’anguaño tienen de tar cerraes toles esplotaciones deficitaries. Nesta categoría entra la compañía pública Hunosa, con una plantiya de 1.300 persones. Bruxeles impon, amás, otra condición qu’enzanca la supervivencia del sector: les empreses rentables tán obligaes a devolver les ayudes que recibieren. Pa evitar qu’esta decisión emponga al zarru a les compañíes que puedan siguir la so actividá, el Gobiernu d’Asturies reclamó al Ministeriu d’Enerxía que solicite más flexibilidá a les autoridaes comuñales a la de proceder al reintegro de los fondos.
Posiciones comunes
Los gobiernos d’Asturies, Castiella y Llión y Aragón comparten criterios básicos al respective de la transición enerxética y la minería. La xunta de el presidentes ta pensada p’alcordar un planteamientu conxuntu que va ser treslladáu al Executivu estatal y les instancies de la Unión Europea (UE).
La xunta con Aragón y Castiella y Llión nun foi la única acción encetada esta mañana. Amás d’apostar por caltener la interlocución colos sindicatos, les empreses, los conceyos de les contornes mineres y les fuerces polítiques, el Conseyu de Gobiernu tamién sofitó los planes del conseyeru d’Empléu, Industria y Turismu, Isaac Pola, quien yá confirmó la so asistencia a delles xuntes en Bruxeles previstes pa los díes 26 y 27 de febreru.
L’Executivu decidió da-y a estes cuestiones la mayor prioridá política. El 11 d’avientu yá participó n’Estrasburgo, representáu pola directora xeneral de Minería y Enerxía, Belarmina Díaz, nel llanzamientu de la Plataforma de les Rexones Mineres en Transición (Coal regions in transition platform), na que tán implicaes 41 rexones carboneres de 12 Estaos de la UE. Nesi alcuentru, el Principáu defendió que’l procesu de transición escontra lo que se denomina enerxía llimpia (clean energy) hai de faese de manera progresiva, equilibrada, non traumática y de cuenta que favoreza la innovación. Nesa xunta tamién s’alcordó la creación de dos grupos:
El primeru, d’Economía post carbón y tresformamientu estructural, enfocáu a la busca de nueves actividaes, proyectos y estratexes pa impulsar la diversificación de les contornes carboneres.
El segundu, de Eco innovación y tecnoloxíes de carbón avanzaes, dedicáu a la esploración de proyectos y estratexes p’ameyorar la calidá del aire y amenorgar la emisión de gases d’efectu invernaderu
El conseyeru Isaac Pola va asistir a les primeres xuntes de dambos grupos los citaos díes 26 y 27 de febreru. Pa eses mesmes feches ta entamándose tamién un alcuentru col Parlamentu Européu.