Los agospiamientos turísticos asturianos recibieron n’ochobre a 181.826 visitantes, la meyor cifra de la hestoria para esti mes desque l’Institutu Nacional d’Estadística (INE) rexistra datos.
Amás, el turismu rural sigui creciendo y asítiase como la segunda tipoloxía d’estancia más importante, tres los hoteles, tantu en númberu de viaxeros, como en pernoctaciones y personal contratáu, con medríes del 22,8%, 14% y 10,6%, respectivamente, en comparanza col mesmu mes de 2016. Coles mesmes, destaca la llegada de visitantes internacionales a estos establecimientos, con un aumentu del 88,5%, y más del doble de pernoctaciones (+125%).
Los datos amuesen una medría media de visitantes del 5,5% en toles tipoloxíes d’agospiamientu. Los apartamentos, los campings y l’ufierta rural ameyoren, amás, la cifra de pernoctaciones.
L’enclín positivu refléxase tamién nel personal emplegáu nos establecimientos, que creció de media un 2,8% n’ochobre.
Nos diez primeros meses del añu visitaron el Principáu 2.107.978 turistes que xeneraron 5.207.462 pernoctaciones, lo que supon una medría interañal del 4,9% y del 5,7%, respectivamente. Toles tipoloxíes d’agospiamientu ameyoren los rexistros de 2016 nesti períodu.
