Gaspar Llamazares, voceru parlamentariu d’IX na Xunta Xeneral, en víspores de la presentación nel Parlamentu de los presupuestos, repitió la voluntá d’alcuerdu d’IX –ensin querer llegar a presentar una enmienda de totalidá- y l’intención d’escosar toles posibilidaes de negociación dende mañana a la fecha de presentación de la mentada enmienda anque’l Gobiernu, “optara por una estratexa con riesgos”. “Con riesgos porque nun da cifres, nun esclaria les cuestiones primeramente a presentar el presupuestu y enrieda con temes de xestión como na sanidá o nos planes d’empléu”, concretó Llamazares. IX yá punxo enriba de la mesa les sos propuestes, cuantificando la propuesta social, básicamente de refuerzu del salariu social, midíes de rescate en probeza infantil y enerxética, la reorientación de la política sanitaria escontra l’atención primaria y la salú pública y l’estensión ya integración del 0 a 3 nel conxuntu de la educación pública, resumió’l voceru. Nesti que “puede ser l’últimu presupuestu de la comunidá autónoma” de la llexislatura, IX aportunó n’asuntos que tán roblaos nel pactu de investidura que quier que tean dotaos económicamente, como son los asuntos ambientales, la igualdá de xéneru y llucha contra la violencia, les temes de llingua y cultura asturiana…
“De too esto’l Gobiernu diz que ye receptivu, pero vamos ver cómo se concreta nes cifres presupuestaries, y vamos analizar, pero la posición del grupu y de la dirección non solo determinar en función de les cifres sinón en cómo se xestiona’l presupuestu.”, alvirtió. Con esti argumentu Llamazares apuntó que los modelos xestión de la sanidá asturiana y en relación a los planes d’empléu “xeneren munches duldes y vamos establecer mecanismos de xestión a lo llargo de los próximos meses”.
“Asitiamos na vía d’alcuerdos y de un presupuestu social y d’esquierdes, non n’una prórroga presupuestaria”, resumió.
Ye esa xestión del gobiernu la qu’ocupen les entrugues parlamentaries qu’IX va realizar nel plenu al executivu asturianu y la proposición non de llei, que va ser sobro’l centru de menores de Sograndio. Nesti sentíu, IX considera necesariu’l relevu del director del centru, camudar el proyectu del centru y, xuna apuesta fundamental ye la puesta en marcha de la comisión asesora del centru.
Al respective de les entrugues, IX quier saber cuál ye la razón pola que la Conseyería de Derechos y Bienestar social decidió privatizar el serviciu d’atención directa d’animadores socioculturales al traviés d’una cuantiosa llicitación. IX yá alvierte del previsible ya inmediatu deterioru de la prestación d’un serviciu d’atención directu na xustificación de la urxencia de la entruga. La coalición pregunta, amás, pol planes que l’executivu tien en relación a la xestión de les estaciones d’esquí, al pie de los oxetivos qu’escuerre la Conseyería de Sanidá cola voladura unillateral de los grupos profesionales del conxuntu de los dispositivos de salú mental de la área d’Uviéu ensin la participación de los profesionales.
