L’Executivu alcordó alzar al Conseyu Consultivu’l borrador de decretu de families numberoses, que va simplificar los trámites necesarios para la reconocencia d’esta condición y l’espedición o renovación de los títulos que lu acrediten.
El testu, que yá cunta col vistu bonu del Conseyu Asesor de Bienestar Social, inclúi como principal novedá l’ampliación de la vixencia del títulu, que va pasar de cinco a diez años, y va dexar amenorgar les xestiones alministratives. D’esta miente, en delles situaciones nes qu’agora resulta necesariu anovar añalmente la acreditación, namá va riquise una declaración responsable, lo que va rebaxar el volume de documentación que se debe presentar y va evitar que l’Alministración autonómica tenga que tramitar un espediente completu en cada casu.
El decretu, que va entrar a valir a principios de 2018, recueye tamién los cambeos lexislativos que se fueron produciendo nel ámbitu de la infancia y la familia y que nun figuren na norma vixente, que data de mayu de 2007. Coles mesmes, regula formalmente aspeutos que yá taben consolidaos na práctica, como la espedición de carnés individuales para cada miembru de la unidá familiar.
La Conseyería de Servicios y Derechos Sociales punxo en marcha diverses midíes para entainar la tramitación de los títulos de familia numberosa nesta llexislatura, como la implantación d’una nueva aplicación informática o’l refuerzu de personal, que dexaron amenorgar los tiempos d’espera. Asina, frente a los seis meses que se riquir antes pal llogru d’esta acreditación, el plazu amenorgóse agora a menos d’unu.
El númberu de families numberoses rexistraes n’Asturies a 30 de setiembre xubía a 7.002. D’elles, 6.631 tienen categoría xeneral y 371, especial. Anguaño tramitáronse 3.533 espedientes
