IX sumóse güei a les movilizaciones entamaes por Comisiones Obreras y UGT en defensa de les pensiones. La marcha reivindicativa, que salió esta mañana dende Xixón, na so primer etapa, pretende garantizar la viabilidá del sistema públicu de prestaciones. Nel arranque de la marcha, el diputáu Ovidio Zapico sollertó del peligru que cuerren les pensiones y acometió contra’l PP pola so falta de compromisu colos pensionistes de güei y del futuru. “Una vegada más, la hipocresía de la derecha, encarnada nel PP, que diz una cosa y depués fai lo contrario y que, por non sofitar, nun sofitó siquier la declaración institucional que los grupos de la Xunta queríamos haber, de forma unánime, llanzáu en sofitu d’esta reivindicación. El PP atayó esta posibilidá”.
Poco primero de empecipiase la movilización, el coordinador d’IX en Xixón, Faustino Sabiu, amosó’l so sofitu a la convocatoria sindical que, dixo, realizar pola dignidá del trabayu, pola recuperación del nivel de pensiones y por siguir engarrando por aquello que ye necesariu”.
La secretaria de Política Municipal, Gabriela Álvarez, quixo faer un llamamientu a la participación masiva énte la importancia de les reivindicaciones. “Tamos xugando enforma. Tamos falando de la defensa de les pensiones, de les actuales y sobremanera de les del futuru”.
Pela so parte, la secretaria d’Igualdá, Nidia Gómez, fixo especial énfasis nos especiales problemes qu’afecten a les muyeres por cuenta de la fienda salarial y a unos menores tiempos de cotización que, a la fin de la so vida llaboral, pasen factura. “Munches vegaes, la mayoría apuerta a una pensión non contributiva y creemos que ye necesariu tamién lluchar por unes pensión dignes pa les muyeres que trabayaron tola so vida en distintos ámbitos y que esto se reconoza. La llucha poles pensión ye xuna llucha del presente pero tamién xuna llucha del futuru por que toos y toes tengamos derechu a unes pensiones dignes”.
Na plaza Mayor de Xixón concentráronse cientos de persones con una nutrida representación de afilidados y afiliaes d’Izquierda Xunida, que llegaron dende conceyos tan desemeyaos como Llangréu, Mieres, Uviéu, Gozón, Samartín del Rei Aurelio o de Siero onde, precisamente, tenía güei el so fin la primer etapa d’esta marcha.
