La concejala d’Educación, Mercedes González, anunció l’ampliación de la rede d’escueles infantiles el próximu cursu con un centru de trés unidaes en Trubia. La conceyala refirióse a esa nueva escuela mientres la inauguración del cursu escolar de la rede d’Escueles Infantiles del Conceyu d’Uviéu, na Escuela Dolores Medio.
La nueva escuela infantil va instalar en Sotu de Trubia, nes dependencies qu’ocupaba l’antiguu colexu de la localidá. El Conceyu d’Uviéu va pasar entós a tener ocho escueles infantiles, al sumase la de Trubia a les de Cualloto, La Corredoria, Dolores Medio, La Florida, María Balbín, Montenuño y Rubín.
Plantiya reforzada y con bolsa de personal pa cubrir baxes
La concejala incidió tamién nes meyores que s’enllantaron esti cursu en tola rede d’Escueles Infantiles. Según esplicó González, anguaño reforzóse la plantiya con 19 educadores. La conceyala detalló que se contrataron 19 medies xornaes con un horariu de 5 hores y 15 minutos; aumentóse a xornada completa la media xornada de cinco trabayadores y amás amplióse l’horariu a 48 persones que taben a media xornada con 3 hores y 45 minutos, pasando a emprestar agora un serviciu de 5 hores y 15 minutos al día. Tamién ye novedá anguaño la creación d’una bolsa propia d’educadores pa favorecer y entainar la sustitución de les baxes llaborales.
Tocantes a la matrícula de les escueles infantiles, el cursu empezó con un total de 636 alumnos y alumnes matriculaos, ocho más que’l cursu anterior; 11 alumnos más qu’en 2015 y 58 más qu’en 2013. Per centros escolares, Cualloto tien 21 alumnos matriculaos; La Corredoria, 95 alumnos; Dolores Medio, 141 alumnos; La Florida, 125 neños; María Balbín, 70; Montenuño, 57; y Rubín, 127 alumnos.
Sobro les llistes d’espera, Mercedes González esplicó qu’hubo en toles escueles y tramos d’edá, sacante en Cualloto, onde solo hubo llista d’espera pal tramu de menores de 1 añu y en La Corredoria, con llista d’espera nes unidaes de ñácaros menores d’un añu y de ente 1 y 2 años.
