El Ministeriu de Fomentu, al traviés de la Demarcación de Carreteres del Estáu n’Asturies, va empecipiar esti vienres 14 d’ochobre obres pal arreglu de tres rotures asitiaes na A-66, calzada sentíu Uviéu ente los puntos kilométricos 22,050 y 23,000, tramu asitiáu al altor del enllaz de Llugones.
Según informa’l Ministeriu en nota de prensa, al coincidir col carril d’incorporación a l’A-66 del enllaz de Llugones en sentido Uviéu, mientres la execución de les obres amás de la corte al tráficu del carril afectáu tamién ye necesariu la corte de dichu ramal, estableciéndose esviadures señalizaes al traviés de les carreteres AS-17 y AS-64.
La zona afectada soporta un tráficu pesáu importante proveniente de los polígonos industriales de la zona, polo que pa intentar causar un menor trestornu les obres van executar en fin de selmana, empecipiándose’l vienres 14 d’ochobre a les 21.00 y tando prevista la reapertura al tráficu escontra les 16.00 hores del domingu 16 d’ochobre.
Los trabayos van consistir na baltadera de la zona afectada, el treslláu d’escombros al vertideru, l’allugamientu d’una nueva armadura, y la conexón cola esistente y posterior estendíu de formigón, que precisa d’un tiempu de curáu y maduración p’algamar la resistencia abonda por que’l tráficu pueda volver circular sobre’l mesmu.
Por cuenta de les elevaes intensidaes de tráficu que tien la vía en tol so percorríu, y col fin d’evitar atascos nes hores punta, amás de los enllaces señalizaos nel enllaz de Llugones los tráficos procedentes de Xixón van poder emplegar rutes alternatives como l’AS-1 o l’AS-II
