La Conseyería d’Infraestructures, Ordenación del Territoriu y Mediu Ambiente, al traviés de la Xunta de Saneamientu del Principáu, va sacar mañana a llicitación les obres de depuración de Arbellales y El Cotu, en Somiedu. Los trabayos, presupuestaos en 668.783 euros, tienen un plazu d’execución de doce meses.
L’actuación, prevista nel Plan Xeneral calidable de les Agües, va dexar evitar los arramaos contaminantes de dambes poblaciones. El proyectu inclúi, xuntu con otres instalaciones, les partíes pa la construcción de la rede de colectores que van conducir les agües dende les actuales redes de saneamientu a les nueves infraestructures, los emisarios hasta los puntos d’arramáu nos calces y la reposición de los firmes de viales públicos y servicios afectaos poles obres.
Nel casu de Arbellales, les instalaciones van tener una capacidá equivalente pa 125 habitantes, capaz de tratar tamién la eventual medría de población que se produza nel branu y otres dómines del añu.
El Cotu ta compuestu por dos barrios: el principal (Coto de Buenamadre) y el secundariu (San Miguel de Llera). El primeru cuenta con rede de saneamientu y un sistema de depuración basáu nuna fuesa séptica allugada nes proximidaes del regueru Cueva. San Miguel de Llera, sicasí, nun tien rede de saneamientu. P’arreglar esta situación executará un colector principal qu’intercepte la rede d’El Cotu, conduza les agües residuales al traviés de San Miguel de Llera y recueya los arramaos d’esti núcleu. Les instalaciones van tener una capacidá equivalente pa 90 habitantes y van ser aptes p’atender les medríes de población que se dean nel branu.
