La Conseyería de Presidencia y Participación Ciudadana, al traviés del Institutu Asturianu de la Mocedá, convocó la XXVII edición del programa de promoción de mozos creadores Culturaquí 2016, qu’inclúi’l Premiu Nuevos realizadores del Principáu d’Asturies, entamáu en collaboración col Festival Internacional de Cine de Xixón (FICX).
van almitise los proyectos pa curtiumetraxes de tema llibre que se desenvuelvan en castellán o asturianu y nun superen los 25 minutos de duración. Los trabayos presentaos tendrán d’incluyir: guión, presupuestu, plan de rodaxe, memoria de dirección, plan d’esplotación y formatu d’exhibición, cualquier fonte de financiamientu adicional, acreditación, etcétera.
El certame inclúi un premiu en metálicu de 5.000 euros, amás del estrenu de la obra ganadora nel Festival Internacional de Cine de Xixón de 2017.
Los trabayos van poder presentase hasta’l próximu 14 d’ochobre nel rexistru xeneral de la Conseyería de Presidencia o ser unviaos por aciu corréu certificáu a les dependencies del FICX.
El programa Culturaquí pretende promover la creación artística xuvenil en distintes modalidaes, como la lliteratura o la música; fomentar la participación de moces con moliciones artístiques y espublizar estes manifestaciones culturales tantu dientro como fora d’Asturies.
La participación ta abierta a cualesquier artista que naciera o more n’Asturies y que la so edá nun supere los 35 años. Tamién pueden participar descendientes hasta segundu grau d’emigrantes, una posibilidá que dexó internacionalizar el programa ensin arrenunciar a les bases d’asturianía sobre les que se sofita dende la so creación.
