El Principáu autorizó la contratación de dos obres de depuración nos conceyos de Navia, Coaña y Somiedu, nes que se van invertir 1.023.320 euros.
Unu de los alcuerdos adoptaos faculta a la xunta de saneamientu a realizar les acometíes eléctriques pa la estación depuradora d’agües residuales (EDAR) de Navia-Coaña, y les estaciones de bombéu d’agües residuales d’El Espín y el muelle de Navia. El contratu tien un plazu d’execución envaloráu de 18 meses y un presupuestu de 354.537 euros, que se va financiar con cargu a tres anualidad: 130.000 euros anguaño, 204.537 el próximu y 20.000 en 2018.
L’otru alcuerdu autoriza a la xunta de saneamientu a contratar y executar les obres de depuración de Arbellales y El Cotu, en Somiedu, núcleos que cunten con 41 y 29 habitantes, respectivamente. El proyectu ta valoráu en 668.783 euros, de los que 35.000 van abonase anguaño y los 633.783 restantes en 2017. Los trabayos tendrán de concluyir nel plazu d’un añu dende la so axudicación.
