L’helicópteru Helimer 207 de Salvamentu Marítimu, la salvamar Rigel y la llancha de Xixón de Cruz Roja d’Asturies busquen, dende esti sábadu pela nueche, a un mozu bañista sumíu na sablera de Carranques (Perlora) mientres se daba un bañu. Según informó Salvamentu a Europa Press, el dispositivu volvió a entamar la busca a primer hora d’esti domingu.
Salvamentu recibió l’avisu en redol a les 21.00 hores d’esti sábadu, dempués de que trés hermanos s’enfusaren nel mar cuando yá nun taba activu’l salvamentu en sableres. Unu de los hermanos llogró salir pol so propiu pie, ente que l’otru tuvo que ser rescatáu.
El tercer hermanu, que respuende a les sigles A.B., sigue inda sumíu. Con el baxamar d’esti domingu, a les 9.38 hores, el dispositivu retomó la busca. Nes próximes hores van incorporar a la xera l’helicópteru del Serviciu d’Emerxencies del Principáu d’Asturies y los GEAS de la Guardia Civil.
