El Muséu de la Hestoria Urbana d’Avilés acueye, dende esti xueves hasta’l 7 d’agostu, la esposición ‘Compañía Asturiana de Comedies: 100 años de teatru asturianu’. El director y fundador de l’Asociación Cultural Compañía Asturiana de Comedies, Eladio Sánchez, y la conceyala de Cultura, Yolanda Alonso, van asistir al actu d’inauguración.
La esposición, producida pola Asociación Cultural Compañía Asturiana de Comedies, ta compuesta por una serie de paneles nos que pueden contemplase numberoses fotografíes antigües, por aciu les cualos el visitante va poder realizar un viaxe al traviés de la hestoria del teatru costumbrista asturianu mientres los últimos cien años. Nomes como los de ‘Pachín de Melás’, Isidro Carballido o Eladio Verde destaquen como impulsores d’esti xéneru escénicu.
Completen l’amuesa otros materiales como programes de mano, cartelos, distinciones o trofeos, como la Medaya del Conceyu de Xixón, concedida a l’asociación en 2010, según reconocencia a la so trayectoria. Amás, van esponese siete figures representatives d’otros tantos personaxes característicos de la trayectoria escénica de la compañía.
Esta esposición foi entamada por cuenta de una doble efeméride: el centenariu del teatru costumbrista n’Asturies y el 30º aniversariu de l’Asociación Cultural Compañía Asturiana de Comedies. L’Antiguu Institutu de Xixón foi la primer parada d’esta amuesa qu’en pasando per Avilés va visitar otres localidaes tales como Candás o Llangréu.
Los díes 23, 24, 30 y 31 de xunetu la mesma Compañía Asturiana de Comedies va realizar visites empuestes a la esposición.