El conseyeru de Sanidá del Principáu, Francisco del Busto, manifestó esti xueves en sede parlamentaria que la tasa d’obesidá infantil, de menores de dos a 17 años, ta un puntu y mediu perbaxo de la media estatal según los últimos datos de los que se dispón asitiándose nel 26,5%, con un descensu de casi dos puntos del 2009 al 2011.
Del Busto manifestóse asina en respuesta a una interpelación plantegada pol diputáu de Ciudadanos, Luis Armando Fernández Bartolomé, sobre la prevalencia de la obesidá infantil na rexón y les polítiques sanitaries al respective.
El conseyeru coincidió col diputáu de Ciudadanos en que’l de la obesidá infantil ye un problema «seriu» y manifestó que’l trabayu nel Principáu p’atayar los problemes de sobrepesu y obesidá infantil n’Asturies ye intensu y llévase a cabu en collaboración colos centros escolares y centros de salú.
Frutu de los mesmos la rexón llogró meyorar los datos frente al restu del Estáu que caltuvo les mesmes tases. «Creo que tamos nuna bona llinia de trabayu», indicó’l conseyeru.
Discrepó con Fernández Bartolomé na ubicación de los especialistes psicólogos que defendió asitiar nos centros de salú mental a onde tienen de derivase los pacientes y non nos centros de primaria como reclama Ciudadanos.
El diputáu de Ciudadanos, Fernández Bartolomé, manifestó qu’hai un ábanu de datos, ente ellos qu’unu de cada cuatro neños menores de 14 del Principáu ta penriba del so pesu, que val de base pa considerar que la obesidá n’Asturies tornó nun problema endémicu.
Indicó que la obesidá ye un tema complexu que lleva apareyáu problemes psicolóxicos y sociales polo que reclamó una mayor atención psicolóxica nos servicios d’atención primario.
