El Conseyu de Gobiernu aprobó esti miércoles l’anteproyectu de Llei d’Asturianía y de les comunidaes asitiaes nel esterior, que va sustituyir a la Llei de Reconocencia de l’Asturianía, de 1984, p’afaer la normativa autonómica a les nueves necesidaes de la población emigrante y de les coleutividaes que viven fora del Principáu.
Según informó’l conseyeru de Presidencia y vocera del Executivu, Guillermo Martínez, en rueda de prensa posterior al conseyu de Gobiernu, anguaño, unos 126.000 asturianos moren n’otros llugares del mundu.
El conseyeru va pidir nos próximos díes una comparecencia na Xunta Xeneral del Principáu pa esplicar l’anteproyectu a tolos grupos parlamentarios y solicitar el so respaldu al testu llegal.
L’ámbitu d’aplicación de la reforma llegal, que consta de 23 artículos, va estender a los asturianos nel esterior, a los retornaos, a les comunidaes con reconocencia d’asturianía y a asociaciones que, ensin tener esa reconocencia, promuevan el sofitu a estes persones.
Martínez esplicó que l’anteproyectu complementa l’estatutu de la ciudadanía española nel esterior y establez el marcu xurídicu y los preseos básicos que garanticen l’exerciciu de los sos derechos a los asturianos que viven nel estranxeru y a los emigrantes retornaos.
Ente les principales novedaes de la normativa destaquen l’ampliación del marcu llegal a la población retornada o’l desenvolvimientu de programes d’ayuda económica a persones en situación d’emerxencia, garantizando l’atención sanitaria mientres les sos estancies n’Asturies.
Coles mesmes, van promovese alcuerdos colos centros asturianos n’acciones de promoción turística y empresarial y va avanzase nel usu de les nueves tecnoloxíes pa fomentar les relaciones, sobremanera, colos colectivos más nuevos.
L’anteproyectu tamién recueye la celebración, cada cuatro años, d’un Congresu Mundial d’Asturianía y l’ellaboración d’un plan integral d’emigración, amás de la regulación específica de la Escuela d’Asturianía como espaciu d’alcuentru y formación.
