La conseyera de Desenvolvimientu Rural y Recursos Naturales, María Jesús Álvarez, aseguró esti miércoles que los daños causaos pol llobu nes cabanes ganaderes asturianes nun aumentaron nos primeros meses de 2016 sinón que baxaron «un 20 per cientu» los espedientes rellacionaos.
Contradiciendo les afirmaciones del sindicatu agrariu COAG nes qu’el so dirixente n’Asturies, Mercedes Cruzáu, aseguraba que «cada vez hai más llobos» qu’amás «maten por prestar», la conseyera aseguró que, magar el llobu xenera «dificultaes» a los ganaderos, el problema «nun se debe magnificar».
Nesti sentíu, esplicó en rueda de prensa que’l Principáu trabaya con un programa d’estracción de llobos col qu’a lo llargo d’estos cinco meses ablayáronse 15 de los 45 cánidos previstos pa 2016, un cupu razonable» teniendo en cuenta la población n’Asturies.
Sobre esti censu, la titular de Desenvolvimientu Rural aseguró qu’el del Principáu ye’l más «fiel a la realidá», frente a los sindicatos qu’afirmen qu’hai más llobos de los que se recueyen nel censu y los conservacionistas qu’aseguren que’l censu recueye una realidá a l’alza».
Dando respuesta a la manifestación convocada pa esti miércoles por ganaderos en protesta polos daños del llobu y poles indemnizaciones consiguientes, la conseyera incidió en que sería «deseable» actualizar los baremos d’indemnización, anque dexó claro que lo apurrío pol Principáu «ta na llínea de lo que paga Agroseguros».
CONDERGA L’APAICIÓN D’UN LLOBU DEGOLLÁU
Preguntada polos periodistes sobre l’apaición de la cabeza d’un llobu degolláu en Salas, Álvarez condergar afirmando que se trata d’un actu bárbaru» que «nun conduz a nada».
«Nun hai mas que manifestar l’absolutu refugu a estes acciones illegales que contribúin a dar una bien mala imaxe del territoriu y qu’hai que condergar ensin paliativos», manifestó, pa dempués informar de que’l Principáu yá treslladó al Seprona tola información disponible pa esclariar los fechos ya identificar a los responsables.
