Más de 40 candidatures de 21 nacionalidaes opten anguaño al Premio Princesa d’Asturies de les Artes 2016, primer galardón que se va fallar nesta XXXVI edición. El xuráu, que s’axuntó esti martes n’Uviéu, nun quixo desvelar la llínea de les sos preferencies anque embaraxen delles posibilidaes como la música, les artes plástiques y les escéniques.
Ente güei y mañana los 17 miembros del xuráu van axuntar nel céntricu Hotel de Reconquistar d’Uviéu pa deliberar en redol a toles candidatures y llograr, antes de les 12.00 hores d’esti miércoles, una posición consensuada.
A entrugues de los periodistes la Directora Xeneral de la Área de Música Prisa Radio, Sandra Rotondo, nuevu miembru del xuráu, decantóse por un galardón empobináu a premiar la innovación na música y les artes escéniques. Ente los nomaos, reveló la presencia de los músicos Paul Mccartney o Tonny Bennet. Anque reconoció la dificultá de que los sos nomes salgan ganadores, incidió en que «lo bono» ye velos «yá» nuna llista.
Pela so parte, el director del Muséu del Prau, Miguel Zugaza, aseguró que «yá toca» defender abiertamente la candidatura d’un artista plásticu, afirmando que «hai bien bonos candidatos» nesta disciplina.
La editora y comisaria d’arte contemporaneo Elena Ochoa, reveló amás el nome del artista americanu James Turrell como una de les opciones al ser «el gran innovador de la lluz, la claridá y los espacios inspiradores n’espacios ensertaos na naturaleza».
Pela so parte, el director de teatro Josep María Flotats aseguró qu’hai candidatos «bien meritorios» na llista, destacando la presencia de l’actriz española Nuria Espert. Ensin desvelar nomes, sorrayó qu’hai «cuatro o cinco» candidatos que «a lo menos» merecen esti galardón.
Los Premios Princesa d’Asturies tán destinaos a galardonar «el llabor científicu, técnica, cultural, social y humanitaria realizada por persones, instituciones, grupu de persones o d’instituciones nel ámbitu internacional».
Conforme a estos principios, el Premiu Princesa d’Asturies de les Artes va conceder a aquellos «que la so llabor na cinematografía, el teatru, la danza, la música, la fotografía, la pintura, la escultura, l’arquitectura y otres manifestaciones artístiques constituya una aportación relevante al patrimoniu cultural de la humanidá».
A esti premiu opten un total de 40 candidatures, procedentes d’Alemaña, Arxentina, Austria, Brasil, China, Estaos Xuníos, Estonia, Finlandia, Guatemala, Hungría, Irlanda, Italia, Macedonia, Marruecos, Mauritania, Noruega, Portugal, Reinu Uníu, Rusia, Suráfrica y España.
El Premiu ta dotáu con una escultura de Joan Miró -símbolu representativu del galardón-, la cantidá en metálicu de 50.000 euros, un diploma y una insinia.
Los miembros del xuráu van caltener un primer alcuentru colos medios de comunicación a les 11.00 hores (GMT+2:00) del martes, día 10, nel Salón de Conseyos del Hotel (primer planta), darréu antes de la so constitución formal y del entamu de los sos deliberaciones.
El fallu fadrá públicu a les 12.00 hores del miércoles, día 11, nel Salón Cuadonga del mesmu Hotel. La llectura del fallu va ser distribuyida en directu al traviés del satélite Hispasat pa Europa y América, y podrá siguise tamién n’Internet al traviés de la web de la Fundación.
El xuráu d’esti premiu ta integráu por Bárbara Allende Gil de Biedma (Ouka Leele); José Luis Cienfuegos Marcello; Marzio Conti; Carlos Fitz-James Stuart Martínez de Irujo, duque d’Alba; Josep María Flotats i Piques; Carmen Giménez Martín; Catalina Luca de Tena y García-Conde; José Lladó Fernández-Urrutia; Hans Meinke Paege; Elena Ochoa Foster; Alfredo Pérez de Armiñán y de la Serna; Sandra Rotondo Urcola; Benedetta Tagliabue; Patricia Urquiola Hidalgo; Carlos Urroz Arancibia; Miguel Zugaza Miranda; y José Antonio Caicoya Cores.
