El preciu de los vehículos usaos n’Asturies baxó un 4,7 per cientu nel primer trimestre de 2016, según informa esti vienres la plataforma internacional AutoScout24 nel so Observatoriu européu de precios’. Nel conxuntu del país, el preciu creció un 4,8 per cientu.
Según estos datos, Asturies ye, xuntu con Aragón, la única comunidá con precios hasta marzu en descensu, con un importe mediu de 13.178 euros.
Per otra parte, según apunta l’Asociación Nacional de Vendedores de Vehículos a Motor (Ganvam), les vientes de vehículos d’ocasión n’Asturies xubieron un 17,7 per cientu nel primer trimestre, con 10.317 unidaes. N’España, el mercáu de VO creció un 17,3%, hasta les 480.285 unidaes.
Esti impulsu débese sobremanera al bon comportamientu que tán teniendo los coches medionuevos, con una edá media menor de tres año. No que va d’exerciciu, les sos vientes disparáronse un 47,6% y yá atropen el 20% del mercáu, cuatro punto más que nel mesmu periodu del exerciciu anterior.
Los modelos d’esti rangu d’edá son los más demandaos y tamién los que más problemes de stock representen pa los concesionarios. Según datos de la consultora MSI, hasta marzu, faltaben unes 6.000 unidaes pa cubrir la demanda esistente de coches usaos «nuevos».
Sía que non, los coches con más de diez año d’edá siguen siendo, no que va d’añu, los más vendíos nel mercáu d’ocasión, representando un 51% del total y creciendo a un ritmu del 13,8%. L’añu pasáu, la edá media d’esti mercáu foi de 10,8 años, cifra que se va repitir en 2016.
