La conseyera d’Infraestructures, Ordenación del Territoriu y Mediu Ambiente, Belén Fernández, anunció güei na Xunta Xeneral del Principáu qu’el so departamentu va ellaborar un programa pa incentivar el compostaje y la recoyida de basura orgánica. La so redacción va salir a llicitación esti mes por 96.800 euros y ta previstu que tea rematáu primero qu’acabe l’añu.
Esta iniciativa va dexar analizar el sistema de recoyida de basura urbana de cada conceyu y proponer alternatives más eficientes, previa evaluación de los costos d’implantación y d’esplotación, según les midíes necesaries pa la so puesta en funcionamientu.
Fernández esplicó que pa llegar al cumplimientu normativu en 2020 ye necesariu aplicar de forma decidida la recoyida separada de materia orgánico en cases y actividaes comerciales daqué que “tien de constituyir la columna vertebral del nuevu sistema de xestión de borrafes”. Esti métodu va dexar un tratamientu eficiente de los mesmos y tamién la xeneración d’un material recuperáu calidable, el compost, y de biogás na planta de biometanización construyida pol Consorciu pa la Xestión de les Borrafes Sólides d’Asturies (Cogersa), que tien capacidá pa tratar 30.000 tonelaes al añu.
La titular de Mediu Ambiente recordó tamién que Cogersa trabaya nesta dirección dende 2013, cuando s’aprobó lluna llínea de subvenciones de dos millones añales pa favorecer la implantación voluntaria del serviciu de recoyida separada de materia orgánico d’orixe domésticu y comercial nos conceyos. El programa dexaba tratar de forma gratuita los biorresiduos que s’apurrieren na planta de biometanización clasificaos n’orixe y cubría hasta la metá de los costos acomuñaos a la compra de contenedores especiales, les campañes de sensibilización ciudadana, la recoyida viaria y el tresporte a les instalaciones de Serín.
Puntos llimpios y educación ambiental
Otra de les llínees d’actuación previstes p’anguaño busca facilitar a la ciudadanía la posibilidá de que deposite les sos borrafes especiales, contaminantes o avolumaos en puntos llimpios. Pa ello, van sumar a la rede cuatro nueves instalaciones en Piloña, Tinéu, Cangas de Narcea y Samartín del Rei Aurelio, por unos 1,2 millones, y dos puntos d’avolumaos n’Onís y Santalla d’Ozcos, por 140.000 euros. Amás, van rematase los de Ribedeva, Ribesella y Candás, amás del d’avolumaos d’Eilao.
De forma paralela, Cogersa va siguir desenvolviendo programes d’educación, concienciación y sensibilización ambiental, como la Rede d’Escueles pol Reciclaje o la Campaña de Compostaje Domésticu, que traten d’influyir sobre los vezos de consumu y les práctiques de xestión de borrafes.
La conseyera aseguró que la situación de partida de la comunidá nun ye negativa, yá que cunta con una xestión pública, centralizada y solvente de les borrafes, y con una sociedá concenciada. Ello ye que Asturies ye la cuarta comunidá autónoma con meyores índices de recoyida separada, namá por detrás de Navarra, País Vascu y Cataluña, según datos del Institutu Nacional d’Estadística (INE).
A lo último, valoró tamién l’ameyoramientu esperimentáu l’añu pasáu, cuando la recoyida separada de restos de papel/cartón, envases llixeros y vidriu aumentó un 5,05%, porcentaxe que s’alza hasta casi’l 18% na última década.
