El Gobiernu del Principáu decidió dar lluz verde a la firma d’un conveniu de collaboración ente la Dirección Xeneral de Deporte y l’Axencia Española de Protección de la Salú nel Deporte (Aepsad) en materia de llucha contra’l dopaxe.
La robla del alcuerdu, que va anovar l’esistente, van llevar a cabu’l director xeneral de Deportes del Gobiernu del Principáu, José Ramón Tuero, y el director de Aepsad, Enrique Gómez Bastida, el próximu día 19 nel marcu d’unes xornaes sobre la llucha contra’l dopaxe nel deporte que van tener llugar n’Uviéu y Xixón.
Según informó esti domingu’l Gobiernu asturianu, la finalidá del conveniu ye la d’establecer futures fórmules de cooperación destinaes a executar programes de sofitu a la protección de la salú nel ámbitu del deporte, según la de facilitar un conxuntu de preseos didácticos pa empobinar y formar a los deportistes.
L’alcuerdu compromete a dambes entidaes a definir los medios materiales y personales necesarios pa contribuyir a una práctica deportiva más saludable y segura.
La collaboración trai tamién la promoción de la investigación científica y técnica en materia de protección de la salú de los deportistes y la llucha contra’l dopaxe. Y promocionar, coles mesmes, la firma de compromisos éticos pa un deporte llimpio per parte de deportistes, entrenadores y técnicos.
L’alcuerdu preve la organización de xornaes, seminarios y xuntes conxuntes empobinaes a deportistes, técnicos, médicos deportivos y personal de sofitu, pa informar sobre los procedimientos que se lleven a cabu na Aepsad pa la prevención de la salú, el control del dopaxe, y los riesgos de les sustances y los métodos prohibíos. El propósitu ye llevar estes actividaes a centros d’enseñanza y universidaes, y dirixiles a estudiantes y profesores.
El conveniu contempla la ellaboración conxunta de protocolos de detección y comunicación de práctiques ilícites na llucha contra’l dopaxe, que, xuntu al xuegu llimpiu, son l’oxetu final de la collaboración ente la Dirección Xeneral de Deportes y Aepsad en tolos ámbitos nos que puedan tener competencies y por tolos medios que tán a la so disposición.
El director xeneral de Deporte, José Ramón Tuero, recuerda que la robla del alcuerdu «nun supon sinón la renovación del que suscribimos en 2011. De magar, camudaron munches coses nel ámbitu de la llucha contra’l dopaxe. Como siempres, el nuesu oxetivu ye mentalizar a los deportistes, y a quien practiquen actividaes físiques n’Asturies, de qu’hai que garantizar el deporte llimpio».
Les xornaes nes que se va faer efectiva la firma del conveniu y nes que van disertar sobre la llucha contra’l dopaxe nel deporte educador esternos y espertos xurídicos de Aepsad, van tener llugar n’Uviéu, el próximu día 19, y en Xixón, el día 20.
