El Ministeriu de Facienda unvió cartes a 12 comunidaes autónomes qu’incumplieron l’oxetivu de déficit en 2015 por que, nun plazu de 15 díes, aprueben alcuerdos de non disponibilidad de creitos y efectúen les retenciones necesaries pa garantizar el cumplimientu del so oxetivu d’estabilidá presupuestaria.
Nestes cartes, recoyíes per Europa Press, Facienda recuerda a les comunidaes que p’aprobar estes midíes tienen de tener en cuenta los recursos del Sistema de Financiamientu de les Comunidaes Autónomes de los que van disponer en 2016, que van suponer una medría al respective de los recibíos en 2015, según los aforros nos costos financieros de los préstamos con cargu a mecanismos adicionales de financiamientu.
En concretu, nel casu d’Asturies va disponer anguaño d’un total de 2.531,01 millones d’euros en conceutu de recursos del Sistema de Financiamientu de Comunidaes Autónomes suxetos a lliquidación que suponen una medría total según el Ministeriu al respective de los percibíos en 2015 pola Comunidá de 112,72 millones d’euros.
Igualmente, como s’establez nel escritu, tienen de considerase los aforros derivaos de les midíes adoptaes pol Gobiernu d’amenorgamientu de costos financieros de los préstamos formalizaos con cargu a mecanismos adicionales a comunidaes autónomes que pal añu 2016 el Ministeriu envalora un importe total de 43,42 millones p’Asturies.
«Esti financiamientu adicional va facilitar a la Comunidá atender la non disponibilidad solicitada y cumplir cola riegla de gastu, ensin determinar necesariamente, y siempres en función del presupuestu vixente pa 2016, un amenorgamientu del gastu en relación a executar nel exerciciu anterior», establez la carta.
Les comunidaes a les que Facienda unvió cartes son Andalucía, Aragón, Asturies, Cantabria, Baleares, Cataluña, Castiella-La Mancha, Castiella y Llión, Estremadura, Madrid, Murcia y Valencia.
