Xixón Sí Puede reclamó que s’empiece a aplicar el Plan de Normalización de la llingua asturiana del Conceyu de Xixón, aprobáu pol equipu de Gobiernu’l mes de setiembre pasáu, «col compromisu de sacar alantre la iniciativa a principios de 2016».
Nuna nota de prensa, Xixón Sí Puede considera que «ye’l momentu nel qu’hai de ponese en marcha’l Plan de Normalización del Asturianu. A esto comprometió l’equipu de Gobiernu esti branu, n’aceptando’l ruegu de Xixón Sí Puede (XsP) nel que se propunxo esta midida p’atayar el retrocesu na normalización del asturianu nel conceyu».
«Una vegada que’l mes de xineru llega a los sos últimos díes, Mario Suárez del Fueyo, voceru de XsP, va preguntar na Comisión de Cultura del llunes si yá esiste’l citáu Plan de Normalización. XsP tien amás constancia de qu’el Conseyu Asesor de la Llingua se xunta’l mes de noviembre pasáu -lo que yera un pasu previu pa la puesta en marcha del Plan- polo qu’agora tocaría empezar a aplicar esti documentu», anuncia la formación.
La iniciativa de XsP tien por oxetivu «escosar toles posibilidaes» de la Llei d’Usu y Promoción del Asturianu, «da-y vida a la llingua» y que l’Alministración ponga tolos medios por que la ciudadanía pueda usar l’asturianu. Asina lo espunxo Mario Suárez del Fueyo nel momentu de presentación del Plan, cuando esplicó que «una de les primeres acciones tenía que ser la visibilización del asturianu p’animar al so usu ente la ciudadanía. Esta visibilización hai de faese dende l’Alministración al traviés de la publicidá institucional, nos medios de comunicación y polo xeneral en tolos ámbitos nos que’l Conceyu tenga presencia, tantu como organizador d’eventos, como cuando dea subvenciones y sofitos a tou tipu d’iniciatives».
