Cada asturianu va gastar anguaño una media de 88,5 euros nel Sortéu Estraordinariu de la Llotería de Navidá, lo qu’asitia a la comunidá como la tercera con mayor gastu por habitante del conxuntu del país, siendo la media nacional de 62,72 euros, según los datos de conseñamientu per habitante de Lloteríes y Apuestes del Estáu (LAE). El conseñamientu nel Principáu xube a 93 millones d’euros.
Sicasí, esta cantidá ye estimativa una y bones el datu va ser definitivu cuando se reciban les devoluciones de boletos ensin vender, el próximu 21 d’avientu. L’añu anterior, el conseñamientu previu foi de 61,5 euros.
D’esta miente, los más de 62 euros de gastu per persona correspuenden a les estimaciones de vienta que fai LAE a la d’unviar los boletos a les alministraciones de llotería, anque más tarde siempres hai una proporción de décimos que se queden ensin vender.
Por territorios, la comunidá autónoma que previsiblemente más va gastar por habitante anguaño ye Castiella y Llión, con una media de 93,03 euros, siguida de La Rioxa (88,67 euros), Asturies (88,5 euros), Aragón (87,37 euros), Madrid (76,95 euros), País Vascu (74,84 euros), Cantabria (71,22 euros), Valencia (70,60 euros), Castiella-La Mancha (65,70 euros), Murcia (61,14 euros).
Mientres, los que menos van gastar anguaño son los habitantes de les ciudaes autónomes de Melilla (13,07 euros) y Ceuta (13,49), siguíos de los de Baleares (35,8 euros), Canaries (40,68 euros), Andalucía (44,51 euros), Estremadura (47,93 euros), Navarra (55,08 euros) y Cataluña (56,92 euros).
Por comunidaes autónomes, onde más Llotería de Navidá va vendese previsiblemente ye en Madrid (496,6 millones d’euros conseñaos), siguida de Cataluña (427,9 millones d’euros), Andalucía (374 millones d’euros), Comunidad Valenciana (353 millones d’euros), Castiella y Llión (232 millones d’euros), Galicia (163 millones d’euros), País Vascu (163 millones d’euros), Castiella-La Mancha (136 millones d’euros) y Aragón (115 millones d’euros).
Otra manera, los que menos Llotería de Navidá tienen conseñada son Melilla y Ceuta (1,1 millones d’euros), La Rioxa (28 millones d’euros), Navarra (35 millones d’euros), Baleares (39 millones d’euros), Cantabria (41 millones d’euros), Estremadura (52 millones d’euros), Canaries (85 millones d’euros), Murcia (89 millones d’euros) y Asturies (93 millones d’euros).
