El Conseyu de Ministros autorizó esti vienres un creitu estraordinariu de 3.829.922 euros pa obres en carreteres asturianes afectaes poles envernaes de 2015. En concretu, pa la estabilización de la fastera tres el desprendimientu de tierres na N-634 (p.k. 347), nel conceyu de Parres.
En total, el Conseyu de Ministros autorizó l’aplicación del Fondu de Continxencia por importe de más de 9 millones (9.056.939 euros) y la concesión d’un creitu estraordinariu nel Ministeriu de Fomentu por esa cuantía p’adoptar midíes urxentes y reparar los daños causaos polos hinchentes y otros efectos de les envernaes d’agua, nieve y vientu de los meses de xineru, febreru y marzu de 2015, y financiar asina obres d’emerxencia en delles carreteres del Estáu.
Esti creitu tamién se va destinar a actuaciones d’arreglu en carreteres estatales d’Huesca, Cantabria y Tarragona.
