La ministra de Fomentu, Ana Pastor, defendió esti martes en Xixón la voluntá política y compromisu tantu del Gobiernu español como francés por que se recupere «de forma inmediata» el serviciu de l’autopista del mar Xixón-Nantes (Francia), que foi suspendíu unilateralmente pola empresa axudicataria de la concesión en 2014. «Tol máximu enfotu», sostuvo.
Asina lo indicó, en respuesta a los medios de comunicación en presidiendo la xunta del Conseyu d’Alministración de Xixón al Norte, al respective de les duldes del empresariu qu’aspira a faese cola esplotación de la llínea marítima de que Puertos del Estáu tea impulsando realmente la continuación d’esti serviciu.
Pastor aportunó en qu’hai dineru nos presupuestos que nun se va a gastar pol abandonu del serviciu. Recordó, a esti respectu, que la suspensión de la llínea de forma unillateral fíxose porque había una clausa del contratu introducida por un Gobiernu socialista que lo dexaba.
Según la ministra, nun se trata de dineru si non de qu’haya una empresa que se faiga cargu del proyectu nes mesmes condiciones. Ye más, indicó que cualquier empresa que quiera operala tien unes obligaciones llegales, a lo que pidió «seriedá».
